Dambe: Buhari ya taya Anthony Joshua murna kan nasarar buge Pulev

Daga ABBA MUHAMMAD

Shugaban Ƙasa Muhammadu Buhari ya nuna farin cikin sa da nasarar da dan damben Nijeriya, Anthony Joshua, ya samu a kan Kubrat Pulev a fafatawar da suka yi a daren jiya Asabar.

A sanarwar da ya fitar ta hannun kakakin sa, Femi Adesina, Buhari ya ce Joshua ya bai wa masoya dambe a duniya da ma Nijeriya farin ciki sosai.

Shugaban ya ce ya tuna da haduwar da ya yi da Joshua a Ingila, inda ya bayyana shi a matsayin mai saukin kai kuma wanda ya samu tarbiyya, ya ce zai yi nasara sosai a rayuwar sa.

Ya kuma yi wa dan damben fatan nasara a fadan sa na gaba, inda ya ce ‘yan Nijeriya za su taya shi da addu’a.