Daga SANI AHMAD GIWA a Abuja
Wasu ma’aurata da aka sace tare da ’yarsu mai watanni shida a gidansu da ke Millennium City, a Jihar Kaduna, sun roƙi jami’an tsaro da su gaggauta ɗaukar mataki domin ceto su daga hannun waɗanda suka yi garkuwa da su.
Ma’auratan, Ahmed Abubakar Zakka da matarsa, sun yi wannan roƙo ne a wani bidiyo da ya yaɗu a kafafen sada zumunta, inda aka ga Zakka riƙe da jaririyarsu, yayin da matarsa ke zaune a gefensa. A cikin bidiyon, an ga wani daga cikin masu garkuwa da su ya nufi bindiga ga Zakka.
An sace ma’auratan ne a ranar 6 ga Oktoba, 2026, lokacin da wasu ’yan bindiga suka kai hari a gidan Alrahus Estate da ke Millennium City, a ƙaramar Hukumar Chikun ta Jihar Kaduna.
Rahotanni sun nuna cewa maharan sun isa unguwar da misalin ƙarfe 11:30 na dare, inda suka riƙa shiga gidaje suna neman waɗanda za su sace. Daga bisani, sun kutsa cikin gidan Zakka tare da yin garkuwa da shi, matarsa da jaririyarsu.
A cikin bidiyon, wanda ya ɗauki tsawon daƙiƙa 40, Zakka ya bayyana cewa masu garkuwa da su na neman kuɗin fansa har naira miliyan 300 kafin su sake su.
Ya ce: “Sunana Ahmed Abubakar Zakka. Ina neman taimako. An sace ni, matata da ’yarmu a Millennium City ranar Litinin da misalin ƙarfe 11:30 na dare. Muna roƙon taimako saboda suna neman naira miliyan 300. Don Allah, muna neman agaji.”
Bidiyon ya nuna Zakka riƙe da jaririyar da ke kuka, yayin da ake jin muryar matarsa tana roƙon a tausaya musu tare da taimaka musu su samu ’yanci.
An kuma sace mace mai ciki
Baya ga iyalan Zakka, maharan sun kuma yi garkuwa da wata mata mai juna biyu, wadda mijinta, Abdulkadir Bello, yake Abuja a lokacin da lamarin ya faru.
Bello ya bayyana cewa matarsa ta kira shi da misalin ƙarfe 11:30 na dare, ta sanar da shi cewa wasu mutane na ƙoƙarin shiga harabar gidansu da ƙarfi.
Ya ce ya yi ƙoƙarin kiran ’yan sanda, amma bai samu damar tuntubar su ba, kafin daga bisani ya kira jami’an soji, waɗanda suka tura jami’ansu zuwa yankin.
Sai dai Bello ya tabbatar da cewa daga baya maharan sun yi nasarar sace matarsa, sannan suka tuntube shi domin neman kuɗin fansa.
Wannan sabon hari ya ƙara jawo damuwa kan yawaitar hare-hare da sace mutane a Millennium City da sauran yankunan da ke wajen birnin Kaduna.
Kimanin kwanaki biyar kafin wannan hari, wasu ’yan bindiga sun kashe wani mutum mai suna Sikiru tare da yin garkuwa da matarsa da ɗansa, baya ga wasu mutane shida a yankin PW Babban Saura.
Matar Sikiru mai suna Hafsat da ɗansu Abdulsalam, mai shekara 14, na ci gaba da kasancewa a hannun masu garkuwa da mutane, waɗanda suka nemi kuɗin fansa mai yawa domin sake su.
Ma’auratan sun shafe shekaru shida ba su haihu ba
Wani ɗan’uwan Zakka, wanda ya nemi a sakaya sunansa, ya bayyana cewa ma’auratan marayu ne da suka shafe shekaru shida da aure ba tare da samun ɗa ba, kafin Allah Ya albarkace su da jaririyarsu Fatima, wadda yanzu take da watanni shida.
Ya ce: “Dukansu marayu ne, sun rasa iyayensu kafin su yi aure. Sun shafe shekaru shida da aure ba tare da haihuwa ba, kafin Allah Ya ba su jaririya mai suna Fatima watanni shida da suka wuce.”
Majiyar ta bayyana cewa ita da Zakka sun taso tare a gidan iyalinsu, kuma sun zauna tare tun lokacin samartakarsu. Ta ƙara da cewa ma’auratan sun koma gidan da aka sace su a cikinsa ne kusan shekara guda da ta wuce.
Ya ce: “Mun taso tare a gidan iyalina, kuma mun zauna tare a lokacin samartakarmu. Muna roƙon hukumomi da su taimaka wajen ganin an kuɓutar da su lafiya.”
Atiku ya buƙaci jami’an tsaro su gaggauta ceto su
Tsohon Mataimakin Shugaban ƙasa, Atiku Abubakar, ya yi kira ga jami’an tsaro da su gaggauta ɗaukar matakan ceto Zakka, matarsa, jaririyarsu da sauran ’yan Nijeriya da ke hannun masu garkuwa da mutane.
Atiku, wanda shi ne ɗan takarar shugaban ƙasa na jam’iyyar African Democratic Congress (ADC), ya yi wannan kira ne a wani saƙo da ya wallafa a shafinsa na Facebook ranar Litinin, inda ya bayyana bidiyon a matsayin abin tausayi da ke nuna yadda matsalar rashin tsaro ke barazana ga rayuka da rarraba iyalai a faɗin ƙasar.
Ya ce: “Bai kamata wani ɗan Nijeriya ya kasance yana roƙon a ceci rayuwarsa ko ta iyalinsa daga hannun masu aikata laifuka ba. Tunani game da jariri da aka jefa cikin irin wannan hali yana da matuƙar tayar da hankali.”
Ya buƙaci hukumomin tsaro da abin ya shafa da su gaggauta ɗaukar matakan da suka dace domin tabbatar da an kuɓutar da Zakka, matarsa, ɗansu da duk sauran mutanen da ake tsare da su.
Atiku ya kuma bayyana cewa sace mutane na ƙara tsananta wahalhalun da ’yan Nijeriya ke fuskanta sakamakon tsadar rayuwa.
Ya ce: “Wannan mummunan lamari ya faru ne a lokacin da iyalai ke fama da matsin tattalin arziki da tsadar rayuwa. ’Yan Nijeriya na fama da hauhawar farashin abinci, sufuri da sauran muhimman kayayyaki; bai kamata su ƙara rayuwa cikin tsoron sace su a gidajensu ko a kan hanyoyi ba.
“Rashin tsaro na ƙara tsananta wahalhalu, yana kawo cikas ga hanyoyin samun abin rayuwa, tare da jefa iyalai cikin matsalolin tunani da na kuɗi waɗanda da ƙyar suke iya ɗauka.”
Tsohon mataimakin shugaban ƙasar ya yi kira ga gwamnati da ta wuce matakin yin alƙawura kawai, ta ɗauki matakai masu ɗorewa domin ceto waɗanda aka sace, kare al’ummomin da ke cikin haɗari da kuma tarwatsa hanyoyin sadarwar masu aikata laifukan.
Ya ce: “Dole ne gwamnati ta wuce yin alƙawura kawai, ta samar da ingantaccen mataki mai ɗorewa: ta kuɓutar da waɗanda ake tsare da su, ta kare al’ummomin da ke cikin haɗari, sannan ta tarwatsa hanyoyin sadarwar waɗanda ke aikata waɗannan laifuka. Kowane ɗan Nijeriya yana da ’yancin rayuwa, aiki da renon iyalinsa ba tare da fargabar tashin hankali a kowane lokaci ba.”
Atiku ya kuma miƙa saƙon ta’aziyya da jaje ga iyalan Zakka da sauran iyalan da ’yan’uwansu ke hannun masu garkuwa da mutane, yana mai jaddada cewa kare rayukan ’yan ƙasa ya kamata ya kasance babban nauyin gwamnati.
Ya ce: “Tunanina da addu’o’ina suna tare da iyalan Zakka da duk iyalan da ke fama da raɗaɗin sace ’yan’uwansu. Kare rayuwar kowane ɗan Nijeriya dole ne ya kasance babban nauyin da gwamnati ta ɗauka.”
Amnesty International ta ce babu wani yanki na Millennium City da ke da tsaro
ƙungiyar kare haƙƙin bil’adama ta Amnesty International Nigeria ta yi gargaɗin cewa babu wani yanki na Millennium City da za a iya ɗauka a matsayin mai cikakken tsaro, tana mai cewa ’yan bindiga na gudanar da ayyukansu a yankin a kowane lokaci na yini.
A wani saƙo da ta wallafa a shafin ɗ, ƙungiyar ta bayyana cewa hare-hare da sace mutane sun ƙaru a Millennium City da yankunan da ke kewaye da shi.
Ta ce: “’Yan bindiga da sauran masu ɗauke da makamai na gudanar da ayyukansu a yankin a kowane lokaci, ba tare da fargabar fuskantar hukunci ba. A ranar 19 ga Agusta, wasu ’yan bindiga sun kai hari a yankin Kyauta, inda suka yi garkuwa da mutane sama da goma. Ana sace mutane har da rana tsaka.
“A wasu sassan yankin, mutane na kafa ƙungiyoyin sa-kai domin kare kansu, yayin da wasu ke barin gidajensu suna ƙaura zuwa wuraren da suke ganin sun fi aminci.
“Babu wani yanki na Millennium City a Kaduna da ke da aminci a yanzu. Mutane na rayuwa cikin fargaba a kowane lokaci, suna jiran harin gaba ko sace mutane, ko duka biyun. Wasu mazauna yankin sun dakatar da karatun ’ya’yansu.
“Kashe-kashe da sace mutane da ke ci gaba da faruwa, tare da gazawar hukumomi wajen kawo ƙarshen waɗannan ayyuka da hukunta waɗanda ake zargi da aikata su, na ci gaba da zama barazana ga haƙƙin rayuwa a Jihar Kaduna.”
’Yan sanda sun kama mutum 12, sun ƙwato bindigogin AK-47
A wani mataki na daban, Rundunar ’Yan Sandan Jihar Kaduna ta sanar da kama mutum 12, ciki har da waɗanda ake zargi da yin garkuwa da mutane guda takwas da kuma wasu mutum huɗu da ake zargi da taimaka wa masu aikata laifuka ta hanyar ba su bayanai.
Rundunar ta kuma ƙwato bindigogin AK-47 a yayin wasu ayyukan tsaro da ta gudanar tare da haɗin gwiwar sauran hukumomin tsaro domin yaƙi da satar mutane da sauran laifuka a Millennium City da Maraban Rido.
A cikin wata sanarwa da ta fitar ranar Litinin, Kakakin Rundunar ’Yan Sandan Jihar Kaduna, DSP Mansir Hassan, ya ce kamen ya biyo bayan ƙarfafa ayyukan share fagen tsaro, samamen da aka kai wurare da ake zargi, da kuma sintiri a yankunan sakamakon matsalolin tsaron da suka faru a baya-bayan nan.
Ya bayyana sunayen mutum takwas da ake zargi da satar mutane a matsayin Dauda Murna, Usman Abdullahi, Abubakar Sulaiman, Saleh Abdullahi, Usman Muhammed, Mathias Moses, Makama John da Tafarki Audu.
Sauran mutum huɗu da ake zargi da bayar da bayanai ga masu aikata laifuka su ne Shuaibu Sabiu, Audu Makama, Simon Moses da Amadu Mathew.
Hassan ya ce binciken farko ya nuna cewa biyu daga cikin waɗanda aka kama sun amsa zargin fallasa bayanan ayyukan ’yan sanda ga masu aikata laifuka.
Ya bayyana cewa fallasa bayanan motsin jami’an tsaro da ayyukansu na kawo cikas ga ƙoƙarin yaƙi da laifuka, tare da jefa rayukan jami’an tsaro da mazauna yankunan cikin haɗari.
Kakakin rundunar ya ƙara da cewa ana ci gaba da bincike domin gano irin rawar da kowane wanda ake zargi ya taka, gano sauran waɗanda ka iya kasancewa tare da su, da kuma gurfanar da duk wanda aka tabbatar da laifinsa a gaban kotu.
Ya kuma bayyana cewa Gwamnatin Jihar Kaduna ta bai wa rundunar ƙarin motocin sulke guda uku masu ɗauke da makamai (APCs), domin ƙarfafa ƙarfin gudanar da ayyukan tsaro a Millennium City da yankunan da ke kewaye.
Kwamishinan ’Yan Sandan jihar, Muhammad Rabiu, ya buƙaci mazauna yankin da su kasance masu sa ido tare da kai rahoton duk wani motsi da suke zargi ga ofishin ’yan sanda mafi kusa.
Ya bayyana cewa Millennium City na kewaye da dazuzzuka a wajen birnin Kaduna, lamarin da ke ƙara muhimmancin samun bayanan sirri da haɗin gwiwar jama’a wajen yaƙi da masu aikata laifuka.
Sanarwar ta ƙara da cewa kwamishinan ya bayar da umarnin tura ƙarin jami’an tsaro na musamman, motocin aiki da sauran kayan aikin tsaro zuwa yankunan da lamarin ya shafa domin ƙarfafa sa ido, gaggauta kai ɗauki da kuma hana sake aukuwar laifuka.
Rabiu ya yi kira ga mazauna yankunan da su kwantar da hankalinsu tare da ba hukumomin tsaro haɗin kai ta hanyar bayar da sahihan bayanai cikin lokaci domin taimakawa wajen yaƙi da satar mutane da sauran laifuka.
