Daga SANI AHMAD GIWA a Abuja
Tsohon Mataimakin Shugaban ƙasa kuma ɗan takarar shugaban ƙasa a jam’iyyar African Democratic Congress (ADC), Atiku Abubakar, ya buƙaci Kamfanin Mai na ƙasa (NNPC) da ya yi cikakken bayani kan Naira tiriliyan 11.2 da aka rubuta a cikin bayanan kuɗinsa na shekarar 2025 a matsayin kuɗin da gwamnatin tarayya ke binsa.
Atiku ya kuma buƙaci Fadar Shugaban ƙasa ta bayyana duk wani tallafin kuɗi ko na kayan aiki da ’yan kwangilar gwamnati suka bai wa ayyukan yaƙin neman zaɓen Shugaba Bola Ahmed Tinubu na 2027.
Atiku ya yi wannan kira ne cikin wata sanarwa da Phrank Shaibu, Daraktan Sadarwa na Yaƙin Neman Zaɓen Shugaban ƙasa na ADC, ya fitar a ranar Lahadi.
Ya nemi NNPC ta bayyana nawa daga cikin kuɗin da gwamnatin tarayya ke binsa ya shafi kuɗaɗen da aka kashe ko aka ciwo domin kare ababen more rayuwar man fetur da iskar gas, nawa aka biya, wa aka biya da kuma irin ayyukan da aka gudanar.
Sai dai bayanan kuɗin NNPC sun nuna cewa Naira tiriliyan 11.2 da aka rubuta a matsayin kuɗin da gwamnatin tarayya ke binsa ba yana nufin cewa Naira tiriliyan 11.2 ne aka kashe kai tsaye wajen bai wa ’yan kwangilar tsaron bututun mai ba. A shekarar 2025, jimillar kuɗin da NNPC ke binsa daga gwamnatin tarayya ta tsaya a kan Naira tiriliyan 11.20, daga Naira tiriliyan 17.51 a shekarar 2024.
Bayanan kuɗin NNPC na shekarar 2024 sun nuna cewa kamfanin na bin gwamnatin tarayya Naira tiriliyan 17.512. Wannan adadi ya haɗa da kusan Naira tiriliyan 8.672 na kuɗaɗen tsaron makamashi da kuma Naira tiriliyan 8.840 na wasu kuɗaɗen da ake binsa daga gwamnatin tarayya. Sai dai a shekarar 2025, bayan an yi wasu gyare-gyare da daidaita asusu, adadin kuɗin da aka rubuta a matsayin sauran kuɗaɗen da gwamnatin tarayya ke binsa ya kai kusan Naira tiriliyan 11.2.
Atiku ya ce bayanan ba su isa su nuna wa ’yan Nijeriya nawa aka kashe kai tsaye wajen bai wa bututun mai kariya ba.
Ya ce, “Rahotonta na shekarar 2025 ya nuna cewa kusan Naira tiriliyan 11.2 ne gwamnatin tarayya ke binsa. ’Yan Nijeriya ba za su iya fahimtar jimillar Naira nawa aka kashe wajen bai wa bututun mai tsaro ba. Nawa aka kashe? Wa aka biya kuɗin? Aikin me aka yi? Kuma ina sakamakon aikin?”
Atiku ya kuma nemi gwamnati ta bayyana dalilin da ya sa ake kashe irin waɗannan maƙudan kuɗaɗe wajen kare ababen more rayuwar man fetur a lokacin da ƙasar ke fuskantar matsalolin tsaro.
Sai dai NNPC ta sha kare shirinta na bai wa bututun mai tsaro, tana mai cewa tsarin ya taimaka wajen ƙara samar da ɗanyen mai daga ganga 960,000 a rana a shekarar 2022 zuwa matsakaicin ganga miliyan 1.71 a rana a shekarar 2025. Kamfanin ya ce tsarin ya haɗa da tattara bayanan sirri, ayyukan tsaro, sa ido, haɗin gwiwar masana’antu da kuma sa ido daga al’ummomin da ke yankunan.
A watan Afrilu, sama da ’yan majalisar tarayya 300 sun goyi bayan ci gaba da amfani da Tantita Security Serɓices Nigeria Limited wajen tsaron bututun mai, bayan wani taron majalisar dokokin ƙasa kan tsaron bututun mai.
Atiku ya kuma tambayi ayyukan siyasa na Goɓernment Ekpemupolo, wanda aka fi sani da Tompolo, wanda ke da alaƙa da Tantita, kamfanin da ke aikin tsaron bututun mai a yankin Neja Delta.
Tantita na da alaƙa da aikin sa ido da tsaron bututun mai na gwamnatin tarayya a yankin Neja Delta, yayin da Ekpemupolo ya kafa tare da ɗaukar nauyin gangamin siyasar “PBAT Door-to-Door Moɓement”, wanda ke yaƙin neman zaɓen Shugaba Tinubu domin wa’adi na biyu.
“Tantita aka bai wa kwangilar samar da tsaro ga bututun mai a yayin da wanda ya assasa kamfanin ya aike da motocin yaƙin neman zaɓen Shugaba Tinubu a karo na biyu,” inji Atiku.
Blueprint Manhaja ta ruwaito cewa ƙungiyar ta raba motocin yaƙin neman zaɓe ga masu gudanar da ayyukanta a ƙananan hukumomi 34 na Jihar Katsina. Haka kuma, a ranar Lahadi, ta raba motoci 25, janareto da lasifika na lantarki a Jihar Taraba.
Sai dai Atiku bai gabatar da wata hujja da ke nuna cewa kuɗin kwangilar Tantita ne ake amfani da su wajen tallafa wa ayyukan siyasar ƙungiyar ba.
Atiku ya kuma yi tambaya game da yadda aka bai wa kamfanin Hitech Construction Company Limited, mallakin iyalan Chagoury, kwangilar aikin babban titin Lagos-Calabar.
An bai wa kamfanin aikin ne ba tare da gudanar da buɗaɗɗen gasa tsakanin kamfanoni ba, sai dai gwamnatin tarayya ta ce an yi amfani da tsarin bayar da kwangilar ta musamman wajen aiwatar da aikin.
Atiku ya buƙaci a bayyana kamfanonin da aka gayyata, takardun neman kwangilar da suka gabatar, yadda aka tantance su da kuma bayanan kwangilar ƙarshe.
Ya kuma nemi a bayyana ko wasu kamfanoni ko mutane masu riƙe da manyan kwangilolin gwamnati sun tallafa wa ayyukan yaƙin neman zaɓen Tinubu da kuɗi, motoci ko wasu kayan tallafi.
Sai dai sanarwar Atiku ba ta gabatar da wata hujja da ke nuna cewa kamfanin Hitech ko iyalan Chagoury sun tallafa wa yaƙin neman zaɓen Tinubu ba.
