Taku Eto, Ministan Gona na Japan, ya fuskanci kakkausar suka daga jama’a bayan da ya bayyana cewa bai taɓa sayen shinkafa ba saboda magoya bayansa ke ba shi kyauta. Wannan furuci ya fito ne a daidai lokacin da farashin shinkafa ya ninka sau biyu sakamakon fari, tsoron girgizar ƙasa da ke tafe, da kuma ɓoye kayan abinci da ‘yan kasuwa ke yi.
Wannan cece-kuce ya tilasta ministan ya ajiye aikinsa, yayin da Firayim Minista Shigeru Ishiba ke fuskantar karin matsin lamba daga jama’a da ‘yan adawa. Wasu na kallon wannan lamari a matsayin rashin fahimtar yadda talakawa ke fama da tsadar rayuwa, inda kusan kashi 60 cikin 100 na al’umma ke ciyar da iyalansu da shinkafa sau biyu a rana.
