Daga BELLO A. BABAJI
Gwamnan Jihar Jigawa, Malam Umar Namadi ya yi kira ga mambobin Jam’iyyar PDP da ke Majalisar Dokoki ta Ƙasa da su shirya sauka daga mukamansu a babban zaben shekarar 2027.
Ya faɗi hakan ne a yayin taron shirin damawa da al’umma na ‘Citizens Engagement Programme’ da aka yi wa laķabi da ‘Gwamnati da Jama’a’ a Dutse, Babban Birnin jihar.
Haka kuma a taron ne kimanin mambobin Jam’iyyun PDP da NNPP guda 3,502 ne suka sauya sheka zuwa Jam’iyya mai mulki, APC.
Ya yi ikirarin cewa, APC za ta sake nasar a dukkan kujerun da bangaren adawa ke riƙe da su da suka samu a zaben 2023.
Gwamna Namadi ya ce APC tana ƙara samun karbuwa a Kudu maso yammacin jihar a sakamakon ƙoƙarinsu na inganta al’umma da samar da ci-gaba a yankin.
A yayin zaben 2023 ne PDP ta samu nasara a manyan muķamai na majalisa wanda daga ciki akwai kujerar sanatan yankin Jigawa ta Kudu maso Yamma, kujerar ƴan majalisar wakilai a mazabun Birnin Kudu/Buji da Dutse/Kiyawa da kuma kujera a majalisar dokokin jihar.
Kazalika, ya jaddada aniyar gwmanatinsa ta cigaba da yi wa al’umma hidima a karkashin jagorancin APC.
