Daga MAHDI MUSA MUHAMMAD
Wata sabuwar taƙaddama ta ɓarke a tsakanin Sanata Ali Ndume mai wakiltar Borno ta Kudu da Majalisar Wakilai, lamarin da ya sake jawo hankali kan batun gaskiya da bin ƙa’ida a harkokin dokokin ƙasa.
Rigimar ta kunno kai ne bayan zargin akwai bambanci tsakanin sigar dokokin haraji da Majalisar Dokoki ta amince da su da kuma wadda aka ce Shugaban ƙasa ya rattaba wa hannu.
Rahotanni sun nuna cewa saɓanin ya ɗauki sabon salo ne bayan Mataimakin Kakakin Majalisar Wakilai, Philip Agbese, ya zargi Sanata Ndume da yaɗa ruɗani ta hanyar iƙirarin cewa an sauya wasu muhimman sassa na dokokin kafin a kai su ga shugaban ƙasa domin sahalewa.
Agbese ya bayyana kalaman a matsayin marasa tushe, yana mai gargaɗin cewa irin waɗannan zarge-zarge na iya rage wa ‘yan ƙasa kwarin gwiwa kan majalisa.
Sai dai Sanata Ndume ya mayar da martani cikin zafi, inda ya ce kalaman Agbese sun wuce gona da iri kuma ba su dace ba, musamman ganin cewa kwamitin da aka kafa a majalisar na ci gaba da bincike kan lamarin.
Ya jaddada cewa damuwarsa ta ta’allaƙa ne kan tsarin doka da sahihancin takardu, ba wai zargin wani mutum da laifi kai tsaye ba.
Tun a makon da ya gabata ne Ndume ya fara tayar da wannan batu a wata hira ta talbijin, inda ya nuna cewa akwai yiwuwar an samu sauye-sauye yayin haɗa sigogin dokar ko kuma lokacin buga ta a hukumance kafin a miƙa wa shugaban ƙasa.
A cewarsa, idan har hakan ta tabbata, zai iya haifar da ruɗani a fassarar doka da aiwatar da ita a nan gaba.
A nasa ɓangaren, Agbese ya ce bai kamata a riƙa yanke hukunci kafin kammala bincike ba. Ya ƙara da cewa, majalisar ta ɗauki matakan da suka dace ta hanyar kafa kwamitin bincike, don haka duk wani zargi na ɓoye gaskiya ko maguɗi bai da tushe a halin yanzu.
Sai dai Ndume ya ce bai dace mataimakin kakakin ya yi irin waɗannan kalamai ba tunda ba shi ne ke jagorantar binciken ba. Ya jaddada cewa kwamitin da ɗan majalisa Muktar Betara ke jagoranta shi kaɗai ne ke da ikon fitar da hukunci kan ko akwai banbanci ko babu tsakanin sigogin dokokin.
Sanatan ya kuma bayyana cewa akwai ƙananan kalmomi da sauye-sauyen lafazi da ka iya zama babbar matsala a doka. Ya bada misali da bambanci tsakanin kalmomin da ka iya sauya ma’ana a fassarar shari’a, yana mai cewa irin wannan abu ne ya sa ya ga dacewar a sake duba komai a fili.
Ndume ya buƙaci a fito da sigogin dokokin biyu a ajiye su a gefe da gefe domin kwatantawa a bainar jama’a, don kawar da duk wani shakku a zukatan ‘yan ƙasa. A cewarsa, yin hakan zai ƙara tabbatar da gaskiya da amincewar jama’a da majalisa.
A ɗaya ɓangaren kuma, Agbese ya nace cewa majalisar na bin ƙa’ida kuma bai kamata a bar zarge-zarge marasa tushe su karkatar da hankali daga ƙoƙarin gyaran tsarin harajin ƙasa ba. Ya ce ya zama wajibi a bai wa kwamitin damar kammala aikinsa ba tare da matsin lamba daga maganganun siyasa ba.
Wannan sabuwar taƙaddama ta sake haskaka muhimmancin bin sahihancin tsari da bayyananniyar hanya wajen samar da dokoki, musamman waɗanda ke da tasiri kai tsaye kan tattalin arziki da rayuwar al’umma. Yayin da ‘yan ƙasa ke jiran sakamakon binciken, batun ya zama wata jarrabawa ga yadda majalisa za ta tabbatar da gaskiya da riƙon amana a idon jama’a.
