Daga SANI AHMAD GIWA a Abuja
Kotun ɗaukaka ƙara da ke Abuja ta yi watsi da buƙatar tsohon Manjo Hamza Al-Mustapha, inda ya nemi a ƙara masa wa’adin da zai ba shi damar ɗaukaka ƙarar hukuncin da Babbar Kotun Babban Birnin Tarayya (FCT) ta yanke kan wata kadarar da ke Asokoro, Abuja.
Blueprint Manhaja ta ruwaito cewa kwamitin alƙalai uku na kotun ya yi watsi da buƙatar Al-Mustapha baki ɗaya, a hukuncin da ya yanke ranar Litinin, inda ya ce bai gabatar da isassun dalilan da za su sa kotun ta amince da ƙarin lokacin ɗaukaka ƙarar ba.
A hukuncin jagorancin Justice Okon Abang, kotun ta kuma umarci Al-Mustapha ya biya kamfanin Al-Nuri Properties, wanda shi ne kaɗai wanda ake ƙara, kuɗin shari’a naira miliyan ɗaya.
Rikicin ya samo asali ne daga wata kadarar fili da ke Asokoro, wadda rahotanni suka ce Al-Mustapha ya sayar wa Al-Nuri Properties kan kusan naira miliyan 100, kafin daga bisani ya nemi a mayar masa da ita bayan darajar kadarar ta ƙaru.
Daga baya, Al-Mustapha ya bayyana cinikin a matsayin rance, yana mai cewa yana da niyyar mayar da kuɗin da kamfanin ya biya domin kadarar.
Sai dai Al-Nuri Properties ta ƙi amincewa da tayin, lamarin da ya sa kamfanin ya shigar da ƙara a ranar 16 ga Maris, 2020, domin tabbatar da haƙƙinsa kan kadarar.
Daga bisani, Babbar Kotun FCT da ke Zuba ta yanke hukuncin da ya kasance a madadin kamfanin a ranar 16 ga Yuni, 2023, bayan lauyoyin Al-Mustapha sun gaza halartar shari’ar.
Maimakon ya ɗaukaka ƙarar cikin lokacin da doka ta tanada, Al-Mustapha ya koma gaban wannan kotun a ranar 15 ga Afrilu, 2024, inda ya nemi a soke hukuncin da aka yanke a baya.
Sai dai kotun shari’ar ta yi watsi da buƙatarsa a hukuncin da ta yanke ranar 24 ga Satumba, 2025.
A lokacin, wa’adin da doka ta tanada na ɗaukaka ƙarar hukuncin ranar 16 ga Yuni, 2023 ya riga ya ƙare, inda ranar ƙarshe da aka tanada domin shigar da ƙarar ita ce 15 ga Satumba, 2024.
Bayan rashin gamsuwa da hukuncin, Al-Mustapha ya garzaya Kotun ɗaukaka ƙara, inda ya nemi a ƙara masa lokacin da zai ɗaukaka ƙarar hukuncin da aka yanke a 2023.
Sai dai Kotun ɗaukaka ƙara ta soki Al-Mustapha bisa rashin nuna isasshen ƙwazo wajen bin shari’ar a gaban kotun farko.
Justice Abang ya ce bayanan da ke gaban kotun sun nuna cewa Al-Mustapha bai halarci wasu daga cikin zaman shari’ar ba, duk da cewa an aika masa da sanarwar halartar zaman kotun sau da dama.
Kotun ta kuma yi watsi da bayaninsa cewa lauyansa ne ya yi watsi da shari’ar, inda ta ce wannan ba isasshen dalili ba ne da zai ba da damar amincewa da jinkirin ɗaukaka ƙarar.
Justice Abang ya bayyana halin da wanda ya shigar da ƙarar ya nuna a matsayin “yin abin da ya dace a lokacin da bai dace ba.”
Kotun ta ce ya kamata Al-Mustapha ya gabatar da gamsasshen bayani kan dalilin da ya sa bai ɗaukaka ƙarar hukuncin watan Yunin 2023 cikin wa’adin da doka ta tanada ba.
Kwamitin alkalai uku ya kuma ce rashin halartar zaman shari’ar da Al-Mustapha ya yi a kotun farko ya haifar da shakku kan ko zai kasance yana halartar shari’ar idan aka ba shi ƙarin lokacin ɗaukaka ƙarar.
Dangane da zargin cewa an hana shi damar samun adalci, Kotun ɗaukaka ƙara ta ce ba a tauye masa haƙƙin sauraron ƙara ba, tana mai cewa duk wani yanayi da zai iya kama da tauye wannan haƙƙi, shi da kansa ya jawo shi.
Justice Abang ya ƙara da cewa idan mai neman taimakon kotu ya kasa bayar da hujjar da ta dace kan halayensa, ba shi da ikon neman kotu ta yi masa rangwame.
A ƙarshe, Kotun ɗaukaka ƙara ta yi watsi da buƙatar Al-Mustapha na ƙara masa lokacin ɗaukaka ƙarar, tana mai bayyana buƙatar a matsayin wadda ba ta da hujja kuma ta kai ga cin zarafin tsarin shari’a.
Al-Mustapha ya kasance tsohon Babban Jami’in Tsaron Shugaban ƙasa (Chief Security Officer) na marigayi shugaban mulkin soja, Janar Sani Abacha.
