Daga MUHAMMADU MUJITABA a Kano
Kungiyar masu gudanar da harkokin Hajji da Umara ta Nijeriya (HUTOAN), ta rantsar da sabbin shugabanninta na shiyyar Arewa a wani bikin da aka gudanar a birnin Kano a ƙarshen makon da ya gabata.
An gudanar da bikin rantsarwar ne ƙarƙashin jagorancin Alhaji Abdulaziz Halliru Kafin Soli, wanda aka rantsar a matsayin Shugaban ƙungiyar na Shiyyar Arewa. Sauran shugabannin da aka rantsar sun haɗa da Alhaji Yusuf Gadonkaya, Mataimakin Shugaba; Alhaji Mustapha Hamisu Inuwa, Sakataren Kuɗi; da Alhaji Masaud Muazu, Mataimakin Sakataren Kuɗi, da Alhaji Ibrahim Abdullahi Salisu.
Haka kuma, an rantsar da Alhaji Muhammad Sa’adu a matsayin Mataimakin Jami’in Yaɗa Labarai da Hulɗa da Jama’a (PRO), Barista Shu’aibu Gama a matsayin Mai Ba da Shawara kan Harkokin Shari’a, da Alhaji Hasan Yaro a matsayin Jami’in Walwala da Jin Daɗi.
Taron rantsarwar ya samu halartar mambobi da masu ruwa da tsaki na ƙungiyar. Alhaji Muhammad Auwal Sulaiman, ɗaya daga cikin jiga-jigan da suka taka rawa wajen kafa ƙungiyar, ne ya gabatar da sabbin shugabannin a yayin bikin.
Da yake jawabi bayan rantsar da shi, Alhaji Abdulaziz Halliru Kafin Soli, wanda kuma shi ne Mataimakin Shugaban ƙungiyar na ƙasa mai kula da Shiyyar Arewa, ya bayyana cewa ƙungiyar tana da shugabanci na ƙasa ƙarƙashin jagorancin Alhaji Auwalu, wanda tsarin shugabancinsa da yadda yake gudanar da harkokin ƙungiya suke zama abin koyi ga shugabannin shiyyar.
Ya tabbatar wa mambobin cewa sabbin shugabannin za su gudanar da ayyukansu bisa adalci, jajircewa da tsoron Allah, tare da mayar da hankali wajen bunƙasa ƙungiyar da cimma manufofinta.
A nasa jawabin, Mataimakin Shugaban ƙungiyar, Alhaji Yusuf Gadonkaya, ya ce an kafa HUTON ne domin samar da haɗin kai, ƙarfafa haɗin gwiwa da inganta walwala da jin daɗin mambobinta.
Ya bayyana cewa ƙungiyar tana kuma da manufar magance ƙalubalen da masu gudanar da harkokin jigilar alhazai da masu zuwa Umara ke fuskanta, da bunƙasa ƙwarewa a sana’ar, tare da tabbatar da cewa an ba wannan fanni daraja da martabar da ta dace.
Ya ƙara da jaddada cewa babbar manufar ƙungiyar ba ita ce ta zama hanyar neman kuɗi ba, sai dai samar da tsari guda da zai bai wa mambobi damar haɗa kai, kare muradunsu da inganta ayyukan da suke gudanarwa a wannan fanni.
Ana sa ran sabbin shugabannin za su yi aiki wajen ƙarfafa ayyukan ƙungiyar a faɗin shiyyar Arewa, tare da inganta tsari da haɗin gwiwa a harkokin gudanar da aikin Hajji da Umara.
