Daga SANI AHMAD GIWA a Abuja
Babban Jami’in Ayyuka na Rundunar Sojin ƙasa ta Nijeriya, Manjo-Janar Emeka Onumajuru, ya bayyana cewa saura ƙiris su gama da jagoran ’yan ta’adda, Bello Turji.
Manjo-Janar Emeka Onumajuru ya bayyana cewa sojojin suna kan bibiyar motsin Bello Turji, kuma sun gano inda yake, amma bai yi ƙarin bayani ba.
“Babu wani kwan-gaba-kwan-baya a wurin sojoji kan maganar Bello Turji, mun gano inda maɓoyarsa take,” inji Janar Emeka.
Ya ci gaba da cewa a halin yanzu sojoji sun riga sun rutsa Turji a maɓoyarsa, babu inda zai iya motsawa ya je, saboda tsoro.
Ya bayyana haka ne a safiyar Litinin yana mai cewa kwanakon Turji sun kusa ƙarewa.
Janar ɗin ya bayyana haka ne a yayin hirar da gidan talabijin na Channels ya yi da shi a ranar.
