Daga ABUBAKAR LABARAN a Kafanchan
Sarkin Jama’a Alhaji Muhammadu Isa Muhammadu ya yaba wa gwamnatin jihar Kaduna ƙarƙashin jagorancin Sanata Uba Sani kan ayyukan raya ƙasa da ake aiwatarwa a masarautarsa da kewaye.
Sarkin ya yi wannan yabon ne a fadarsa da ke garin Kafanchan a lokacin da yake jawabi ga dubban al’ummarsa da suka yi dandazo domin gudanar da bukukuwan Sallah da kuma karɓar saƙon Sallah da ya saba yi na bikin Eid-El-Fitr.
Alhaji Muhammadu ya bayyana farin cikinsa da cewa a ƙarƙashin jagorancin Sanata Uba Sani baya ga mutunta juna da fahimtar juna a tsakanin al’umma baya ga ɗorewar zaman lafiya, an aiwatar da ayyukan raya ƙasa da dama a yankin, wasu kuma na ci gaba da samun amincewar wasu.
Ya bayar da misali da Jami’ar Applied Science Kachia da za a soma nan ba da daɗewa ba, da kuma Babban Asibitin Kafanchan da aka mayar da shi Cibiyar Kiwon Lafiyar Jama’a baya ga kammala aikin titin Carriage biyu daga gadar Ungwan Rimi zuwa zagayen NEPA ta Kafanchan da dai sauransu.
Yayin da yake taya al’ummar Musulmi murnar kammala azumin watan Ramadan, Sarkin ya bukaci su yi amfani da darussa da tarbiyyar da suka samu a cikin wannan zamani da kuma rayuwa bisa koyarwar Annabi Muhammad.
Shi ma da yake jawabi a fadar shugaban ƙaramar hukumar Jema’a Mista Peter Tanko Dogara ya taya ɗaukacin al’ummar Musulmin ƙaramar hukumar murnar bikin Sallah.
Shugaban ya kuma mika godiyarsa ga mai martaba Sarkin bisa ci gaba da goyon baya da kyakkyawar alaƙar da ke tsakanin ƙaramar hukumar da Masarautar, inda ya yi kira ga ɗaukacin al’ummar yankin da su zauna lafiya da juna ba tare da nuna bambanci ba.
