Daga MAHDI MUSA MUHAMMAD
Mai Alfarma Sarkin Musulmi, Alhaji Sa’ad Abubakar III, ya roƙi Gwamnatin Jihar Sakkwati da ta haɗa da sarakuna a cikin tsarin aiwatar da albashin mafi ƙanƙanta na Naira 70,000.
Sultan Abubakar ya yi wannan roƙon ne yayin taron da Ma’aikatar Kasafin Kuɗi da Tsare-Tsaren Tattalin Arziki ta shirya a matsayin shiri kafin gabatar da kasafin shekarar 2026 na jihar.
An wakilci Sultan ɗin ta hanyar Sarkin Sudan na Wurno, Kabiru Cigari-Alhassan, inda ya jaddada goyon bayan sarakunan gargajiya ga aiwatar da duk manufofi da shirye-shiryen gwamnati a jihar.
Sa’adatu Abubakar, wakiliyar masu nakasa, ta roƙi gwamnati da ta yi la’akari da gyara Makarantar Musamman ta Abdulrashid Adisa Raji tare da kafa ƙarin makarantu na musamman a jihar domin kula da masu nakasa.
Duk da haka, ta yaba wa gwamnatin Gwamna Ahmad Aliyu bisa ƙoƙarinta na inganta rayuwar masu nakasa da sauran ‘yan jihar.
Nafisa Adamu-Gorori, wakiliyar ƙungiyoyin mata, ta buƙaci a ƙara ayyukan samar da ruwa domin rage wahalar mata da sauran jama’a wajen samun ruwan sha mai tsafta.
Ta ce, ƙarancin ruwa yana shafar ƙananan sana’o’in mata, zuwa makarantu da tsaftar muhalli.
Maimuna Yahaya da Musa Bilya sun roƙi gwamnati da ta gyara Asibitin Murtala Muhammad da aka yi watsi da shi, tare da samar da kayan makaranta da yawa a jihar.
Fodio Zakariya da Abdurahman Umar, wakilan ƙungiyoyin Musulunci da na Civil Society Organizations (CSO), sun buƙaci samar da shirye-shiryen da suka shafi al’umma da faɗaɗa makarantun Islamiyya domin ƙarfafa tarbiyya.
Augustine Onah, wanda ya yi magana a madadin al’ummomi, ya yaba da shugabancin Gwamna Aliyu da ya canja jihar Sokoto, tare da roƙon gina hanyoyi masu haɗin gwiwa don bunƙasa kasuwanci.
Tsohon Mataimakin Gwamna, Chiso Dattijo, ya bayyana cewa Sakkwato na da matasa kusan miliyan 5.3 daga cikin jimillar mutane miliyan 7.2 a jihar, don haka ya roƙi ƙara shirye-shiryen koyar da sana’o’i ga matasa.
A jawabinsa, Kwamishinan Kasafi da Tsare-Tsaren Tattalin Arziki, Dr Abubakar Zayyana, ya ce taron na nufin faɗaɗa shawarwari kan kasafin shekarar 2026, bisa ƙa’idoji da suka dace da kyawawan ayyuka na duniya wajen gaskiya da amana.
Wakilin UNICEF, Micheal Juma, ya yaba da ƙoƙarin gwamnati wajen kula da yara, abinci, kiwon lafiya, tsafta, ilimi da kariyar zamantakewa, amma ya roƙi ƙara kuɗaɗe domin ci gaba da waɗannan ayyuka.
Gwamna Aliyu ya bayyana cewa addinin Musulunci zai ci gaba da samun babban kaso a kasafin, bisa manufofi guda tara na gina masallatai da makarantu Islamiyya.
Ya ce, za a gyara wasu hanyoyin samar da ruwa guda huɗu yayin da guda biyu aka kammala.
Ya ƙara da cewa, an shigar da tsarin samar da wutar lantarki ta hasken rana a asibitoci da hukumar ruwa domin shawo kan matsalolin wutar lantarki.
Ya bayyana cewa kashi 60 cikin 100 na makarantu sun samu sabbin kujeru, yayin da saura 40 cikin 100 za su samu nan ba da jimawa ba, tare da ƙara kasafin kuɗi ga abinci, lafiya da ilimin yara.
Aliyu ya kuma bayyana cewa gwamnatin jihar ta haɗa kai da ƙwararru daga United Arab Emirates domin gudanar da shirin haɗin gwiwa kan kiwon lafiya da ilimi wanda za a fara nan ba da jimawa ba.
