Wani lamari mai ban tausayi ya faru a Jihar Adamawa, bayan wata taƙaddama da ta shafi gasasshen nama ta rikiɗe zuwa rikici mai muni, wanda ya yi sanadin mutuwar wani matashi mai shekara 21, yayin da jami’an ‘yan sanda suka cafke mutumin da ake zargi da aikata kisan.
Lamarin, wanda ya faru a yankin Mararaban Vimtim da ke ƙaramar Hukumar Mubi ta Arewa, ya sake jawo hankalin jama’a kan yadda ƙananan saɓani tsakanin mutane kan iya rikiɗewa zuwa babban rikici, har ya kai ga rasa ran mutum.
Rahotanni sun bayyana cewa wanda ake zargi da aikata laifin, mai suna Ibrahim Augustine, mai shekara 28, ya samu saɓani da marigayin mai suna Haggai Markus, mai shekara 21, a kan batun gasasshen nama da ake zargin an ɗauka daga kan teburin wani mahauci.
Bayanai sun nuna cewa lamarin ya faru ne a ranar Laraba, 4 ga Nuwamba, da misalin ƙarfe takwas na dare. A yayin da taƙaddamar ke ƙara ƙamari, ana zargin Augustine ya zaro wuƙa ya daɓa wa Markus a ɓangaren ƙirjinsa.
Wannan hari ne ya jawo mummunan rauni ga matashin, wanda daga bisani ya rasa ransa.
Kakakin rundunar ‘yan sandan Jihar Adamawa, SP Suleiman Yahaya Nguroje, ya bayyana cewa mahaifin mamacin, mai suna Markus Gabo, ne ya kai rahoton faruwar lamarin ga ofishin ‘yan sanda da misalin ƙarfe 8:45 na daren ranar.
Bayan samun rahoton, jami’an ‘yan sanda na sashen Mubi ta Arewa sun garzaya wurin da lamarin ya faru domin gudanar da bincike.
A lokacin da suka isa wurin, sun tarar da Haggai Markus kwance cikin jini, ba ya motsi. Daga nan ne jami’an suka fara gudanar da binciken farko tare da tattara abubuwan da za su taimaka wajen gano yadda lamarin ya faru.
Rahoton rundunar ya bayyana cewa an gano wata wuƙa mai kaifi a wurin, wadda aka kwato domin amfani da ita a matsayin hujja yayin gudanar da bincike.
Haka kuma, jami’an sun cafke Ibrahim Augustine, wanda ake zargi da hannu a mutuwar matashin, tare da tsare shi domin ci gaba da gudanar da bincike.
Daga bisani, an ɗauke gawar marigayin zuwa Babban Asibitin Tarayya da ke Mubi, inda likita ya tabbatar da cewa ya rasu.
