Daga SANI AHMAD GIWA a Abuja
Shugaban Kamfanin NNPC Mele Kyari ya mayar wa attajirin Afirka Aliko Ɗangote martani bayan zargin cewa wasu mutanen NNPC sun mallaki kamfanin tace mai a ƙasashen ƙetare.
A sanarwar da ya wallafa a shafinsa na X, Mele Kyari ya yi watsi da zargin inda ya ce ba shi da wani kamfani na tace mai a ƙasashen ƙetare.
A wani bidiyo da ke yawo a kafofin sada zumunta, Aliko Ɗangote ya yi zargin cewa wasu ‘yan kasuwar mai da mutanen NNPC sun bu ɗe kamfanin tace mai a Malta.
“Mun san inda ake wannan aikin kuma mun san me suke yi, ba wai ba mu sani ba,” in ji Ɗangote.
Da yake mayar da martani, Shugaban NNPC ya ce “ba ni da wani kasuwanci ko wanda ake yi da sunana a ko’ina a duniya idan ba wanda nake yi ba gida na aikin gona.
“Sannan ba ni da masaniya ko akwai ma’aikacin NNPC da yake da matata a Malta ko wani wuri a sassan duniya.”
Shugaban na NNPC ya buƙaci a fallasa wa ɗanda Ɗangote yake zargi tare da sanar da jami’an tsaro domin ɗaukar matakin da ya dace da su.
A cikin bidiyon da ke yawo na Ɗangote, ya yi zargin ana shigo da man da ba ya da inganci a Nijeriya, dalilin ya sa wasu ke samun matsaloli a motocinsu, a cewarsa.
Ya ce idan har ana son tabbatar da gaskiyar abin da yake fada – abin da ya kamata a gudanar shi ne gwaji kan man da ake sayarwa a gidajen mai amma ba daga tashar ruwa ba.
“Wani kawai zai shigo da jirgin ruwa ya gabatar da samfuri da takardar bogi sai a sahale masa – nan gaba za mu ci gaba da magana,” in ji Ɗangote.
