Daga MAHDI MUSA MUHAMMAD
Kungiyar Masu Noma da Sarrafa Kwakwar Manja ta Nijeriya (OPGAN), reshen Jihar Ribas, ta fara zaukar matakan inganta sarrafa manja da kuma kare ingancinsa, domin ƙarfafa amincewar masu saye a cikin gida da kasuwannin ƙasashen waje.
Shugaban ƙungiyar na jihar, Erasmus Chukunda, ya bayyana cewa ana horas da manoma da masu sarrafa dabino kan hanyoyin samar da manja mai inganci, tare da ƙarfafa amfani da injinan zamani wajen sarrafa amfanin gonar.
Chukunda ya ce inganta hanyoyin sarrafa manja zai taimaka wajen rage gurɓatar da ake samu a wasu kayayyakin da ake sayarwa, tare da tabbatar da cewa manjan da ake samarwa ya cika ƙa’idojin da hukumomin kula da ingancin kayayyaki suka gindaya.
Ya bayyana cewa akwai buƙatar manoma da masu sarrafa kwakwar su rungumi sabbin dabaru, maimakon ci gaba da amfani da tsoffin hanyoyin sarrafawa waɗanda za su iya rage ingancin kayayyakin da suke samarwa.
A cewarsa, ƙungiyar tana ƙoƙarin wayar da kan masu ruwa da tsaki a harkar noman kwakwar game da muhimmancin bin ƙa’idojin tsafta da inganci, musamman ganin yadda ake samun ƙarin buƙatar manja a kasuwannin cikin gida da na ƙasashen waje.
Chukunda ya bayyana cewa wasu masu saye daga ƙasashen Tarayyar Turai sun nuna sha’awar sayen manjan da ake samarwa a Nijeriya. Sai dai ya ce waɗannan kasuwanni suna buƙatar tabbacin cewa manjan ya cika ƙa’idojin inganci, kuma ana iya gano inda aka samar da shi da kuma yadda aka sarrafa shi.
Ya ce samun wannan tabbaci zai taimaka wajen ƙara wa manjan Nijeriya daraja, tare da buɗe ƙarin damarmakin kasuwanci ga manoma da masu sarrafa kwakwar.
A cewarsa, idan aka inganta ingancin manja, hakan zai iya taimakawa wajen ƙara yawan kayayyakin da Nijeriya za ta iya fitarwa zuwa ƙasashen waje, tare da samar da ƙarin kuɗaɗen shiga ga masu gudanar da harkar.
Sai dai, ya bayyana cewa cimma wannan buri na buƙatar haɗin gwiwa tsakanin manoma, masu sarrafa kwakwar, dillalai, hukumomin gwamnati da masu sayen manja.
Shugaban ƙungiyar ya kuma nuna damuwa kan yadda wasu masu sarrafa dabino ke ci gaba da amfani da tsoffin hanyoyin sarrafawa, duk da samar da injinan zamani domin inganta aikin.
Ya ce, a wasu wurare, an samar da injinan sarrafa kwakwar tun shekarun 2022 da 2023, amma har yanzu wasu masu sarrafawa ba sa amfani da su yadda ya kamata.
A cewarsa, wannan na iya hana manoma da masu sarrafawa cin moriyar fasahohin da aka tanada domin ƙara inganci da sauƙaƙa aiki.
Saboda haka, ƙungiyar ta jaddada muhimmancin horas da masu sarrafa kwakwar manja kan yadda za su yi amfani da injinan yadda ya kamata, tare da kula da su domin su daɗe suna aiki.
Manja na daga cikin muhimman kayayyakin amfanin gona da ake amfani da su wajen girke-girke da kuma samar da wasu kayayyakin masana’antu. Haka kuma, noman kwakwa na samar da ayyukan yi ga manoma, masu sarrafawa, dillalai da sauran masu harkokin kasuwanci.
Masu ruwa da tsaki a fannin sun daɗe suna jaddada cewa Nijeriya na da damar ƙara yawan manjan da take samarwa idan aka inganta iri, hanyoyin noma, sarrafawa da samun kuɗin jari.
Sai dai, domin cimma wannan buri, ana buƙatar ƙara tallafa wa manoma, inganta hanyoyin sufuri da samar da kasuwannin da za su sayar da kayayyakinsu.
ƙungiyar OPGAN ta bayyana cewa za ta ci gaba da wayar da kan manoma da masu sarrafa kwakwar manja domin inganta samar da manja, kare lafiyar masu amfani da shi da kuma bunƙasa harkar noman kwakwar manja a Nijeriya.
