Daga MAHDI MUSA MUHAMMAD
Matatar mai ta Dangote ta sanar da rage farashin fetur daga ma’aunin sayarwa, inda ta sauke farashin zuwa Naira 1,200 kan kowace lita daga Naira 1,275 da aka sanar a ranar Talata, 7 ga Afrilu, 2026.
Sabon mataki na rage farashi ya zo ne kwana guda kacal bayan ƙarin Naira 75 da aka yi a baya, wanda ya kai kusan ƙarin kashi 5.02 cikin 100. Matatar ta bayyana cewa sauyin ya biyo bayan canje-canjen da ake samu a kasuwar ɗanyen mai ta duniya.
Haka kuma, rahotanni sun nuna cewa matatar ta ƙara farashin man dizal da Naira 200, inda ya tashi daga Naira 1,750 zuwa Naira 1,950 kan kowace lita.
Duk da haka, akwai alamun cewa farashin dizal ɗin na iya sauka nan gaba, kodayake ba a tabbatar da hakan a hukumance ba. Majiyoyin masana’antu sun bayyana cewa wannan sabon sauƙin farashin fetur ba zai yi tasiri sosai a kasuwa ba, domin ƙarin da aka yi a baya bai ɗauki lokaci mai tsawo ba.
Sauyin farashin na baya-bayan nan ya biyo bayan faɗuwar farashin ɗanyen mai a kasuwannin duniya, inda ya sauka ƙasa da dala 100 kan kowace ganga. Farashin Brent ya ragu zuwa dala 95.05, wanda ya nuna saukar kusan kashi 13 cikin 100, yayin da West Teɗas Intermediate (WTI) ya tsaya a dala 97.18, yana nuna kusan kashi 14 cikin 100 na raguwa.
Masana sun danganta wannan faɗuwa da sassaucin rikice-rikicen siyasa a duniya, bayan sanarwar tsohon shugaban Amurka, Donald Trump, na tsagaita wuta na wucin gadi na makonni biyu da ya shafi Iran, wanda ya rage fargabar katsewar samar da mai.
Rahotanni sun kuma nuna cewa Iran ta amince ta buɗe mashigar ruwan Hormuz – wata muhimmiyar hanya da ke ɗaukar kusan kashi 20 cikin 100 na makamashin duniya – na tsawon makonni biyu, a wani ɓangare na yarjejeniyar tsagaita wuta da Amurka.
Wannan ci gaba na nuna yadda sauye-sauyen siyasa da tattalin arziki a duniya ke ci gaba da shafar farashin makamashi, wanda ke da tasiri kai tsaye ga ƙasashen da ke dogaro da mai kamar Nijeriya.
