Daga MAHDI MUSA MUHAMMAD
Hukumomin ‘yan sanda a Birnin Tarayya Abuja sun ce mutane shida ne suka mutu sannan wasu motoci goma sha huɗu suka ƙone sakamakon fashewar wani abu a gadar Karu a babban birnin ƙasar.
Lamarin da ya faru a ranar Laraba a hanyar Abuja-Nyanya-Keffi ya jefa firgici a tsakanin mazauna babban birnin ƙasar.
Sai dai a wata sanarwa da ta fitar sa’o’i bayan faruwar lamarin, kakakin rundunar ‘yan sandan babban birnin tarayya Abuja, Josephine Adeh, ta ce hatsarin ya rutsa da wata tirela da ta kwace, kuma ta faɗa kan wata motar da ke fake.
Sanarwar ta ƙara da cewa, “Tasirin ya rutsa da motoci goma sha huɗu a cikin wani mummunan tashin hankali, firgici da hargitsi ya biyo bayan yadda jama’a da masu ababen hawa suka yi ta tururuwa domin tsira da rayuwarsu.
“An ciro mutanen shida daga cikin tarkacen motar, aka garzaya da su asibiti, amma abin takaici, jami’an lafiya da ke bakin aiki sun tabbatar da mutuwarsu. An ajiye gawarwakinsu a babban asibitin Karu.
A cewarta, tare da shiga tsakani na ‘yan sanda, jami’an kashe gobara, da jami’an tsaro, an shawo kan gobarar tare da dawo da zirga-zirgar ababen hawa kamar yadda aka saba.
“Rundunar ‘yan sandan babban birnin tarayya Abuja na miƙa ta’aziyya ga iyalan waɗanda lamarin ya rutsa da su tare da tabbatar wa jama’a cewa ana gudanar da cikakken bincike don gano musabbabin wannan bala’i da kuma hana afkuwar afkuwar lamarin nan gaba,” inji Adeh.
Lamarin da ya faru a Abuja ya kara samun ƙaruwar tashe-tashen hankula a faɗin Nijeriya a watannin baya-bayan nan. A makon da ya gabata mutane biyu ne suka mutu sannan wasu motoci 12 suka ƙone ƙurmus a lokacin da wata fashewa ta faru a gadar Otedola da ke Legas.
Wata motar dakon mai ɗauke da iskar gas ta taso da wuta a kan gadar, lamarin da ya kai ga gobarar da ta lalata wani gini a yankin. Wasu mutane uku kuma sun samu raunuka sakamakon gobarar da ta tashi. Sai da jami’an agajin gaggawa suka shiga tsakani don kashe gobarar.
