Daga MAHDI MUSA MUHAMMAD
Hukumar da ke Kula da Ayyukan ’Yan Sanda a Nijeriya (PSC), ta ce za a ɗauki matakin ladabtarwa kan ‘yan sandan da suka aikata laifukan take haƙƙin ɗan Adam da wuce gona da iri.
Shugaban PSC, mataimakin Sufeto-Janar na ‘yan sanda, DIG, Hashimu Argungu (mai ritaya) ya bayyana haka ranar Asabar a Enugu.
Argungu ya yi wannan jawabi ne a taron kwanaki biyu na masu ruwa da tsaki na yankin Kudu maso Gabas kan zaman lafiya da tsaro, da jin ra’ayin jama’a kan take haƙƙin bil’adama wanda ƙungiyar lauyoyin Nijeriya, NBA, tare da haɗin gwiwar ƙungiyoyin fararen hula na Kudu maso Gabas, CSOs suka shirya.
Shugaban PSC, wanda Ikechukwu Ani, mai magana da yawun PSC ya wakilta, ya ce yankin Kudu maso Gabas ya zama matattarar rashin tsaro a asar nan da kuma hedikwatar take haƙƙin bil’adama da ba a hukumance ba.
Ya yaba wa waɗanda suka shirya taron da suka yi ta tattaunawa kan rashin tsaro a yankin Kudu maso Gabas
A cewarsa, hukumar da zuciya ɗaya ta tabbatar da manufarta ta samar da mafita don rage laifuka a yankin Kudu maso Gabas.
Ya ce, hukumar ta kuma damu da manyan laifukan take haƙƙin ɗan Adam da wasu ‘yan sanda ke yi, suna muzguna wa al’umma saboda samun kuɗi duk da gargaɗin da aka yi musu.
“Hukumar ba ta ji daɗin cin zarafin aikin ɗan sanda da wasu jami’an tsaro ke yi da sunan samar da tsaro a faɗin wannan yanki, dole ne mu kuɓutar da yankin daga hannun waɗannan gungun ‘yan sanda.
“Mun fahimci cewa ana fama da matsalar rashin tsaro a shiyyar musamman ta yadda hare-haren rashin fahimta daga matasan da aka wanke wa kwakwalwa ke kaiwa.
“Amma wannan a fili bai kamata ba kuma ya zama hujjar sake komawa cikin cin hanci da rashawa daga hukumomin tsaro.
“Mun ci gaba da lura da yadda ake tafka almundahana da karɓar kuɗaɗe a dukkan titunan yankin da kusan dukkanin jami’an tsaro da ya kamata su kiyaye hanyoyin da kuma dawo da zirga-zirgar ababen hawa su ke yi.
“Shingayen da waɗannan jami’an tsaro suka yi, abin takaici sun rikiɗe zuwa ƙofofin karɓar kuɗi inda ake tilasta wa masu amfani da titin su bada kuɗi,” inji shi.
A jawabinsa na maraba, Babban Darakta na Cibiyar Bayar da Shawarar Doka da Lamuni ta RULAC, Okechukwu Nwanguma, ya ce an sanar da masu ruwa da tsaki a kan buƙatar bayyana ƙalubalen rashin tsaro da ke addabar yankin Kudu maso Gabas.
Nwanguma ya ce abin takaici ne yadda yankin Kudu maso Gabas, wanda shi ne yankin da ya fi zaman lafiya da kwanciyar hankali a Nijeriya, sannu a hankali ya faza cikin rikici da rikice-rikice masu yawa.
Ya ce, lamarin ya yi kira da a gaggauta yin aiki tare da yin tambayoyi tare da fahimtar tushen, yanayi, fuskoki da illolin da ke tattare da jin daɗin jama’armu.
A cewarsa, idan muka fahimci abubuwa daban-daban da kuma dakarun da ke haifar da rashin tsaro, za mu iya samar da ingantattun hanyoyin da za a maido da oda, zaman lafiya, tsaro da wadata.
Shugaban RULAAC ya yaba wa Gwamna Peter Mbah bisa ƙoƙarin da yake yi na yaƙi da matsalar rashin tsaro a jihar Enugu, inda ya ce an samu sakamako mai kyau kuma jihar ta zama mafakar tsaro idan aka kwatanta da sauran jihohin yankin.
Ya ce, kafa Asusun Amincewar Tsaro na Jihar Enugu wani shiri ne da ya kamata a yaba masa, inda ya nuna kwazonsa na magance matsalar rashin tsaro gaba ɗaya.
