Daga MAHDI MUSA MUHAMMAD
Tsohon Sakataren Jam’iyyar SDP ta ƙasa, kuma tsohon gwamnan jihar Jigawa, Sule Lamido, ya bayyana cewa an zaɓi Olusegun Obasanjo ne a kan Bola Ige, Olu Falae, da Abraham Adesanya domin samun haɗin kan ƙasa.
A wani ɓangare na littafin tarihin rayuwarsa mai suna ‘Being True to Myself’, wanda aka ƙaddamar a ranar 13 ga watan Mayu, Lamido ya bayyana cewa, Falae, Ige, da Adesanya, ba a ganinsu a matsayin waɗanda za su iya zama shugaban ƙasa masu adalci ga Nijeriya.
A babi na 9, mai suna ‘Abdulsalami’s Transition and Formation of PDP’, ya bayyana cewa, shawarar da aka yanke na mara wa Obasanjo baya ya biyo bayan sha’awar Yarbawa ne da zai iya jagorantar ɗaukacin ‘yan Nijeriya – ba wanda ake ganin shi kaɗai ne shugaban ƙabilar Yarbawa ba.
Lamido ya ci gaba da cewa, “A lokacin ne aka yi ƙoƙarin mara wa Obasanjo baya a matsayin ɗan takarar shugaban ƙasa a jam’iyyar PDP, ‘yan ƙabilar Yarbawa sun ga irin wannan yunƙuri da muka yi, kuma suka buƙaci a ba su zaɓin su zaɓi ɗaya daga cikin mutane uku da za su iya cewa: Cif Olu Falae, Bola Ige, ko Abraham Adesanya, amma babu ɗaya daga cikin waɗannan da zai iya yin shugabanci na adalci a Nijeriya.
“Mun so ne mu sami shugaban ƙasar Yarbawa na Nijeriya, don haka, a sami ɗan Yarbawa a matsayin shugaban Nijeriya, ba shugaban Yarbawa na Nijeriya ba. Wasu mutane a yau suna ganin wannan abin dariya, amma a gare mu, bambancin yana da muhimmanci a lokacin. Duk da haka, mun yi tunanin cewa Obasanjo zai iya aiki yadda ya kamata a matsayin shugaban Yarbawa na Nijeriya ba shugaban Yarbawan Nijeriya ba.
“Yan takara da dama ne suka bayyana a jam’iyyar da suka haɗa da Aleɗ Ekwueme, Abubakar Rimi, Obasanjo da sauransu, Janar-Janar ɗin da suka yi ritaya a PDP sun ba da shawarar cewa ya kamata mu mai da hankali kan Obasanjo saboda dalilai da dama, na farko shi ne ya samu amincewar ‘yan Nijeriya da dama, na biyu kuma daga cikin ƙabilar Yarbawa, yana da martabar fitaccen ɗan Nijeriya.
“A ƙarƙashin gwamnatin Janar Murtala Muhammed, ya riƙe muƙamin babban hafsan hafsoshi, hedikwatar koli, kamar firaminista na soja, kuma ya mulki ƙasar bayan Murtala
Tsohon gwamnan na Jigawa ya ce, an fifita Obasanjo ne saboda mutuncin sa a shekarar 1979, kuma saboda ya tabbatar da nasarar Shehu Shagari duk da matsin lamba da ‘yan uwansa Yarbawa suka yi na ya mara wa ɗan ƙabilarsa Cif Awolowo goyon baya tare da ayyana shi a matsayin wanda ya lashe zaɓen.
Lamido ya ci gaba da cewa, “Janar Obasanjo a matsayinsa na shugaban gwamnatin Soja, kawai ya ɗauki matakin da ya dace wajen tabbatar da sakamakon zaɓen, wannan ya biyo bayan ɗaukaka ƙarar da Cif Awolowo ya shigar, ta hanyar tsarin shari’a har zuwa Kotun Koli, wadda ta tabbatar da hukuncin da Hukumar Zabe ta Tarayya, ta bayar a ƙarƙashin Oɓie Whiskey.
“Ba wa ɗan Yarbawa kujerar shugaban ƙasa shi ne tabbatar da kishin ƙasa na Obasanjo: ya yi yaƙin basasar Nijeriya kuma ya karɓi makaman miƙa wuya daga ‘yan tawayen Biafra, a mulkin ƙasar, ya yi aiki a matsayin mataimakin marigayi Janar Murtala Mohammed.
“Duk da haka, shi ba ɗan siyasar Nijeriya ne ba, tare da furucinsa, kuma ina ganin zaɓin da Obasanjo ya yi a kan ‘yan takararsu, ya fusata Yarbawa, tun daga jiga-jigan siyasarsu a sama, har zuwa talakawa.
“Shawarar da ya yanke na yin watsi da rigimar da ta kunno kai dangane da fassarar nasarar sha biyu da kashi biyu cikin uku, NPN ta samu nasara a zaɓen 1978, da miƙa mulki ga wanda ba Yarabawa ba, shi ne laifinsa na asali; na biyu kuma shi ne ya haɗa wannan ‘laifi’ a lokacin da ya ƙi goyon bayan fafutukar da Cif MKO Abiola ya yi na dawo da wa’adin zaɓen 12 ga watan Yuni.
