Daga BELLO A. BABAJI a Abuja
Hukumar kula da gasar Premeir ta ƙasar Ingila (FA) ta fitar da jaddawalin gasar na bana, wanda za a fara ranar Juma’a, 15 ga watan Agustan 2025.
Wadda ta lashe gasar a kakar da ta gabata, wato Liverpoool, za ta fara kare kambin ne a gida inda za ta haɗu da Bournemouth a ranar farko ta gasar a kakar wasa ta 2025/26.
Manchester United kuwa, za ta fara gasar ne da karawa da babbar abokiyar hamayyarta, Arsenal a filin wasa na Old Trafford.
Liverpool ta lashe gasar ne a kakar farko ta sabon kocin ƙungiyar, Arne Slot da maki 84, yayin da Arsenal ta ƙare a mataki na biyu da maki 74.
Sabuwar ƙungiyar da ta hauro gasar a bana, Sunderland za ta fara gwada ƙarfinta a gasar a gida da karawa da West Ham.
Zakarar gasar Championship kuwa, wato Leeds United, za ta fara da karɓar baƙuncin Everton a ranar Litinin a makon farko, yayin da Burnley da ita ma ta sake dawo wa gasar a bana, inda za ta ziyarci zakarun gasar Europa League Tottenham.
Mancheste City kuwa, wadda ta ƙare kakar bara ba tare da kowane kofi ba, za ta ziyarci Wolverhampton Wanderers a filin wasa na Molineux.
Za a buga wasa 380 a kakar gasar ta bana cikin mako 38, yayain da za a kammala gasar a ranar 24 ga watan Mayun 2026, kamar yadda BBC Hausa ta ruwaito.
