Daga MAHDI MUSA MUHAMMAD
Ofishin Akanta Janar na Tarayya (OAGF) ya tabbatar da cire manyan jami’o’in tarayya (FTI) daga tsarin biyan albashi na IPPIS, wanda ke nuna gagarumin sauyi kan yadda za a tafiyar da biyan albashin waɗannan jami’o’i.
Bawa Mokwa, Daraktan Yaɗa Labarai da Hulɗa da Jama’a na OAGF ne ya bayyana haka a wata hira da ya yi da jaridar The Nation cewa, an dakatar da tsarin IPPIS na FTI biyo bayan umarnin da gwamnatin tarayya ta bayar.
A cewar Mokwa, albashin watan Nuwamba na waɗannan jami’o’i za a riƙa sarrafa su ta hanyar GIFMIS.
An umurci cibiyoyi da su shirya biyan albashi a tsarin Eɗcel don miƙa wa ga IPPIS, inda za a yi tantancewa da tabbatarwa kafin biyan su.
Mokwa ya bayyana damuwarsa game da yuwuwar sauye-sauyen bayanan asusun albashi, yana mai bayyana cewa OAGF ba ta fitar da wani umarni da ya buƙaci ma’aikata su canza cibiyoyin hada-hadar kuɗi da suke da alaƙa da su ba.
Da yake tabbatar wa da ma’aikatan gwamnati kan ƙudirin gwamnati na kyautata rayuwarsu, Mokwa ya jaddada cewa babu wani shiri na bayar da umarni na yaudara ko firgita. Ya bayyana cewa yanke shawarar canza asusun albashi ya kasance zabi ne na kowane ma’aikaci, ba tare da izini daga IPPIS ba.
OAGF, wacce aka fi sani da Treasury, ta buƙaci bankunan da su inganta ayyukansu da kuma tabbatar da ingantaccen tsarin kula da asusu masu riƙe da albashin ma’aikata. Ta bayyana kwarin gwiwa ga hukumomin da ke sa ido kan daidaiton cibiyoyin hada-hadar kuɗi, tare da tabbatar da ikon su na kiyaye muradun ma’aikata.
Ga ma’aikatan da ke da kwararan dalilai na canza asusun albashi, OAGF ta ba da shawarar bin ƙa’idojin hukuma don tabbatar da sauyi ba tare da wata matsala ba, tare da guje wa duk wani cikas a cikin albashi.
