Daga BELLO A. BABAJI
Shugaba Bola Ahmed Tinubu ya ce Gwamnatin Tarayya ta samar da tallafi ga harkar sufuri a yunƙurita na rage raɗaɗin talauci a lokacin bukukuwan ƙarshen shekara.
A yayin saƙonsa na Kirsimeti, Tinubu ya ce gwamnati ta samar da sufurin jiragen ƙasa kyauta da kuma ragi ga sufurin motoci a yayin tafiye-tafiye ga ƴan Nijeriya a lokacin bukukuwan.
Tinubu ya kuma tabbatar wa al’umma cewa hanyoyi za su kasance cikin tsaro, ya na mai cewa sun samar da sauƙin tsadar ababen hawa a titina 144 a sassa daban-daban na faɗin Nijeriya.
Ya yi kira ga kiristoci da su yi wa shugabannin da ma ƙasa baki ɗaya addu’a a yayin bukukuwan nasu.
Kazalika, ya yi kira a gare su da su yaɗa soyayya haɗin-kai da zaman lafiya a tsakaninsu domin kai Nijeriya ga nasarorin da take fatan cimma yayin da su ke cigaba da ƙoƙarin farfaɗo da tattalin arziƙi.
