Shugaban hukumar yaƙi da cin hanci da rashawa ta Jihar Kano (PCACC), Muhuyi Magaji Rimingado, ya shiga hannun ƴan sanda a ranar Juma’a. Wani majiya daga cikin hukumar ya tabbatar da cewa an kama shi, inda ya ce, “Gaskiya ne, an kama shi yau (Juma’a) kuma an tafi da shi Abuja.” An bayyana cewa ‘yan sanda ne suka kama shi ƙarƙashin jagorancin ASP Ahmed Bello.
Ana zargin cewa kamawar ta shafi wata shari’a da ake ci gaba da yi a kotu kan tuhumar tsohon manajan darakta na kamfanin Kano Agricultural Supply Company Limited (KASCO), Bala Muhammed Inuwa, wanda ake zargi da satar kuɗaɗe sama da biliyan huɗu. An fara shari’ar ne a watan Nuwamba 2023 a Kotun Ƙolin Kano ƙarƙashin jagorancin Alkali Hafsat Yahaya, inda aka ƙwace wasu kadarori da ake zargin suna da alaƙa da lamarin.
A watan Disamba 2023, Bala Muhammed Inuwa ya shigar da wata ƙara a gaban Alƙali Aisha Ya’u a wata Kotun Koli ta Kano, inda ya nemi a cire jami’an ‘yan sanda da ke tsare kadarorin da aka ƙwace a Limestone Processing Links Ltd. Alƙali Ya’u ta ba da umarnin cire ‘yan sandan. Duk da haka, hukumar PCACC ta nuna cewa ba ta san wannan ƙara ba. Hukumar ta yi iƙirarin cewa, a matsayinta mai kula da kadarorin, ya kamata a shigar da ita a cikin shari’ar.
Hukumar ta kuma shigar da buƙatar dakatar da aiwatar da umarnin kuma ta nemi a shigar da ita cikin shari’ar, inda ta nuna cewa ‘yan sanda suna kula da kadarorin, wadanda ke ƙarƙashin ikon hukumar.
Kwanaki biyu da suka gabata, Rimingado ya bayyana cewa hukumar sa ta hana wani yunƙurin ƙaura da kadarorin da aka ƙwace, waɗanda aka kimanta su sama da biliyan buyu, ciki har da manyan motoci. An mayar da kadarorin zuwa wani ɗakin ajiya na gwamnati a Nasarawa GRA daga Kumbotso.
