Gwamnatin Tarayya ta amince da ware kason naira biliyan 1.85 domin tallafa wa ilimi, gyara rayuwa, da maido da ‘yan matan Chibok cikin al’umma bayan an ceto su daga Boko Haram.
Ma’aikatar Ilimi a wata sanarwa ta ce tallafin zai ci gaba da ɗaukar nauyin Shirin Gyaran Rayuwar ‘Yan Matan na Chibok har zuwa 2027, ciki har da karatun jami’a, masauki, horon sana’o’i, tallafin lafiyar kwakwalwa, da sauran ayyukan jin kai.
Daga cikin ‘yan matan, 68 suna karatu a Jami’ar Amurka ta Najeriya (AUN), Yola, wacce tsohon Mataimakin Shugaban Kasa Atiku Abubakar ya mallaka.
Haka kuma, za a cigaba da biyan kudin makaranta da masauki duk da korafe-korafen wasu kan tsadar kudin.
“Ministan Ilimi, Dr. Tunji Alausa, ya bayyana cewa Gwamnatin Tarayya na tabbatar da cewa ‘yan mata 108 da aka ceto suna ci gaba da samun cikakken tallafi a fannin ilimi da gyara rayuwa. Ya kara da cewa wannan ba kawai tallafi na kudi ba ne, har ila yau ana bayar da tarbiyya da koyar da dabi’u domin tabbatar da makomar su.”
A ranar 14 ga Afrilu, 2014, ‘yan ta’addan Boko Haram sun sace ‘yan mata 276 daga Gwamnatin Makarantar Sakandaren ‘Yan Mata ta Chibok, Borno.
Har zuwa yanzu, ‘yan mata 87 ba a same su ba, yayin da 108 aka ceto ko aka sake su a matakai daban-daban a tsawon shekaru.
Yawancin ‘yan matan da aka ceto sun samu cikakken shirin gyara rayuwa, wanda ya haɗa da kulawar lafiya, shawarwari kan shawo kan damuwa da tashin hankali, da tallafin ilimi.
Wannan mataki na Gwamnatin Tarayya, ƙarƙashin Shirin Sabon Fata na Shugaba Bola Ahmed Tinubu, yana nuna alkawarin Najeriya na mayar da wannan lamari mai duhu zuwa labari na ƙarfin hali, daraja da fata.
Wannan mataki na gwamnatin tarayya na karkashin Shirin Sabon Fata na Shugaba Bola Ahmed Tinubu, yana nuna alkawarin Najeriya na maida wannan lamari mai duhu zuwa labarin juriya, daraja, da fata, kamar yadda PenPress ta wallafa.
