Daga MAHDI MUSA MUHAMMAD
Hukumar Kula da Hidimar ƙasa ta Nijeriya (NYSC) a Jihar Kogi ta karrama wasu matasa ‘yan hidimar ƙasa guda biyu masu suna Popoola Afeez da Monica Feliɗ, waɗanda soyayyarsu ta fara ne tun lokacin shirin horarwa a sansanin NYSC, har ta kai su ga aure cikin shekarar hidimar su ta ƙasa.
Wannan soyayya da ta kunno kai daga sansanin shirin ƙasa ta ci gaba da ƙulluwa, inda ta kai ga ɗaura aure, lamarin da ya jawo yabo daga abokan hidima da jami’an NYSC.
An bayyana cewa ma’auratan sun sami kyautar kuɗi har N500,000 daga hukumar a gaban sauran ‘yan hidima, yayin da hotunan bikin da murnar su suka karaɗe kafafen sada zumunta.
Shaidar da ake yaɗawa ta nuna ma’auratan cikin farin ciki sanye da kayan NYSC, suna karɓar kyautar tare da jami’an hukumar. Al’amarin ya ja hankalin jama’a a yanar gizo, inda da dama suka taya su murna tare da yaba wa NYSC bisa irin wannan karramawa da tallafi ga soyayya da ta samo asali daga hidimar ƙasa.
Lamari irin wannan yana daga cikin hanyar da NYSC ke tallafawa gina zumunci, haɗin kai da inganta rayuwar matasa tun daga lokacin hidimar ƙasa. Hukumar ta ƙara tabbatar da cewa wannan karramawa na nuni da darajar da take bai wa nasarorin ‘yan hidima a fannoni daban-daban.
