Daga BELLO A. BABAJI a Abuja
A yau Litinin ne Shugaba Bola Tinubu ya yi wata ganawar sirri da gwamnoni guda shida na jam’iyyar APC a Fadar Shugaban Ƙasa da ke Abuja.
Gwamnonin sun isa fadar ne da misalin ƙarfe 4 na yamma domin halartar zaman, wanda ya ɗauki tsawon ƙasa da sa’a guda ana yin sa.
Saidai babu wani ƙarin bayani akan musabbabin abinda aka tattauna a yayin haka duba da cewa ba a sanar da maƙasudin zaman ba.
Blueprint.ng ta ruwaito cewa waɗanda suka halarci zaman sune gwamnonin jihohin Jigawa, Umar Namadi; Edo, Monday Okpebholo; Ekiti, Biodun Oyebanji; Kogi, Usman Ododo; Sakkwato, Aliyu Sokoto; da kuma na Kebbi, wato Nasir Idris.
Haka kuma babu ɗaya daga cikin gwamnonin da ya yi tsokaci a kai bayan kammala zaman.
