Shugaban ƙasar Amurka, Donald Trump, ya bayyana a jawabin sa na shekara-shekara ga Majalisar Dokoki cewa ya kawo “zamanin zinariya na Amurka,” yana ƙoƙarin nuna nasarori duk da ƙarancin amincewa daga ‘yan ƙasa da kuma ƙarin tashin hankali a zuciyar masu jefa ƙuri’a kafin zaɓen tsakiyar wa’adi a watan Nuwamba.
A farkon sa’o’i na jawabin da aka watsa ta talabijin, Trump ya mai da hankali kan tattalin arziki, inda ya ce ya rage hauhawar farashin kaya, ya sa kasuwar hannayen jari ta kai matsayi mafi girma a tarihi, ya sanya dokokin rage haraji, sannan ya sauƙaƙa farashin magunguna.
Sai dai bai bayyana ko wannan kyakkyawan hasashen nasa zai rage fushin ‘yan ƙasa ba game da tsadar rayuwa. Trump ya yi ƙoƙarin ɗaura laifi ga tsohon shugaban Democrat, Joe Biden, game da hauhawar farashi, amma binciken ra’ayoyin jama’a na nuna cewa ‘yan ƙasa na ɗaukar Trump ne a matsayin wanda bai yi isasshen abu ba don rage matsalar tsadar rayuwa duk da cewa ya yi kamfen sosai kan wannan batu.
“ƙasarmu ta dawo mafi girma, mafi kyau, mafi arziki kuma mafi ƙarfi fiye da da,” inji Trump bayan ya hau dandalin, inda ‘yan Republican suka yi masa tayin murna da “USA, USA,” yayin da guraren Democratic da dama suka kasance babu wanda ya halarta, abin da ya nuna yawancin ‘yan majalisar sun ƙauracewa jawabin domin halartar gangamin adawa da Trump a waje.
Jawabin shekara-shekara ga Majalisar Dokoki ya zo ne a lokaci mai sarkakiya ga shugabancin Trump, yayin da binciken ra’ayi ke nuna mafi yawan ‘yan ƙasa sun gaji da yadda yake tafiyar da gwamnati, damuwa ke ƙaruwa kan Iran, sannan shirin harajin sa na ƙasashen waje ya samu cikas bayan Kotun Koli ta Amurka ta soke mafi yawan harajin da ya sanya.
Trump ya tsaya ne kan rubutattun jawabi fiye da kowane lokaci, bai kauce zuwa dogon salon magana na kansa ba, sai dai ya nuna fuskar fada yayin da ya tattauna batun shige da fice, inda ya musayar kalamai da wasu ‘yan majalisar Democrat.
Shugaba Donald ya ƙara da wasu batutuwan jan hankali a taron, inda ya yi alfahari da dukkan nasarorin da Amurka ta samu a lokacin mulkinsa, sannan ya gabatar da wasu “winners,” kamar membobin ƙungiyar kwallon hockey ta maza ta Amurka, waɗanda suka shiga ɗakin Majalisar sanye da medalliyoyin zinare da suka lashe a Gasar Olympics ta hunturu a ranar Lahadi.
Ya bayyana cewa Connor Hellebuyck, mai tsaron ƙofar ƙungiyar, zai samu Presidential Medal of Freedom, ɗaya daga cikin medalliyoyin da aka raba ga baƙi don nuna farin ciki irin na Trump.
Jawabin Trump, ya ɗauki kusan sa’o’i 1 da minti 47, ya karya tarihin jawabin shugaban ƙasa mafi tsawo ga Majalisar Dokoki wanda ya kafa a bara.
Duk da Trump ya ce hauhawar farashi na “raguwa,” farashin kayan abinci, gidaje, inshora da wutar lantarki har yanzu suna sama sosai idan aka kwatanta da shekarun baya. Sabbin bayanai da aka fitar a ranar Jumma’a sun nuna tattalin arzikin ya rage gudu fiye da yadda ake tsammani a kwata na ƙarshe yayin da hauhawar farashin kaya ke ƙaruwa.
Binciken Reuters/Ipsos ya gano cewa kashi 36% kacal na ‘yan Amurka suka aminta da yadda Trump ke tafiyar da tattalin arziki. Democrats na fatan ɗaukar iko da dukkan majalisun biyu daga hannun Republicans a watan Nuwamba, lokacin da duk kujeru 435 na House of Representatives za su shiga zaɓe, sannan kusan kashi ɗaya bisa uku na kujeru 100 na Sanata.
Gwamna Abigail Spanberger na Virginia, Democrat, wacce ta yi nasara a Nuwamba, ta soke Trump kan barin ‘yan ƙasa da ke cikin wahala.
“Shugaban ƙasa yana aiki ne don sa rayuwa ta fi sauƙi a gare ku da iyalanku?” ta tambaya. “Dukkanmu mun san amsa.”
