Daga SANI AHMAD GIWA a Abuja
Mai Martaba Sarkin Gazargamu na Jihar Yobe, Alhaji Ahmad Tijjani Ibn Saleh, ya rasu bayan fama da jinya mai tsawo.
Sarkin ya rasu ne a ranar Talata a birnin Alkahira (Cairo) na ƙasar Masar, inda yake karɓar magani.
ɗansa, Engr. Tijjani Hamisu Bala, Babban Manajan Hukumar Kula da Hanyoyi ta Jihar Yobe (YORMA), ne ya tabbatar da rasuwar ga manema labarai a Damaturu.
A cikin sanarwar da ya fitar, Bala ya bayyana marigayin a matsayin uba, jagora kuma sarki wanda ya sadaukar da rayuwarsa wajen yi wa al’ummarsa da bil’adama hidima.
“Cikin baƙin ciki da mika wuya ga ƙaddarar Allah, ina sanar da rasuwar mahaifina, mai suna na kuma Sarkin Gazargamu, Mai Martaba Alhaji Ahmad Tijjani Ibn Saleh, wanda ya koma ga Mahaliccinsa a yau, 9 ga Yuni, 2026, a Alkahira, Masar, bayan doguwar jinya,” in ji shi.
Ya ƙara da cewa rayuwar marigayin ta kasance cike da hikima, tawali’u, jajircewa da kuma sadaukarwa ga jama’arsa.
“Shawarwarinsa na uba, jagorancinsa da kuma kyakkyawan tarihinsa za su ci gaba da zama abin koyi ga al’umma,” ya ƙara da cewa.
Bala ya yi addu’ar Allah Ya gafarta wa marigayin kura-kuransa, Ya sanya shi a Aljannatul Firdausi, tare da bai wa iyalansa da daukacin Masarautar Gazargamu haƙurin jure wannan babban rashi.
Zuƙowa lokacin haɗa wannan rahoto, ba a bayyana shirye-shiryen jana’izar marigayin ba, kuma har yanzu ba a tabbatar ko za a binne shi a Nijeriya ko kuma a ƙasar Masar ba.
