Daga AISHA ASAS
Wani sabon salon tallata fim ya ƙara daga hankalin masoyan Bollywood kan Haiwaan, bayan masu shirya fim din sun fitar da wani tallan sauti da ya gabatar da jaruman fim din, Saif Ali Khan da Akshay Kumar, kamar abokan gaba da ke shirin fuskantar juna.
Sabon tallan ya mayar da hankali kan karon da ke tsakanin jarumin fim din da babban makiyinsa, inda aka yi amfani da sautin jaruman maimakon dogaro da hotunan fim kawai wajen bayyana irin rikicin da ke tsakaninsu.
A fim din, Saif Ali Khan na taka rawar wani makaho da ya iya fada, yayin da Akshay Kumar ke taka rawar wani mutum mai hatsari da ke zama babbar barazana ga jarumin.
Wannan haɗuwa ta ƙara jan hankali saboda kasancewar jarumai biyu da suka daɗe suna taka manyan matsayi a Bollywood, musamman ganin cewa Haiwaan na zuwa da wani salo da ya hada wasan fada, tashin hankali da labarin wani mutum da ke kokarin kare wata yarinya daga hannun wani mai kisa.
Fim din na karkashin jagorancin darakta Priyadarshan, kuma ana sa ran zai isa gidajen kallon fina-finai a watan Satumba.
Sabon tallan dai ya kara dagula sha’awar masu kallon Bollywood, musamman waɗanda ke son ganin yadda karon Saif Ali Khan da Akshay Kumar zai kasance idan fim din ya isa gidajen kallo.
