Daga AISHA ASAS
Shahararriyar marubuciya kuma jagorar fafutukar kare haƙƙin mata a Amurka, Gloria Steinem, ta rasu tana da shekara 92, bayan shafe sama da shekaru 50 tana cikin manyan muryoyin gwagwarmayar neman daidaito tsakanin mata da maza.
Steinem ta shahara tun shekarun 1960 da 1970, musamman ta hanyar aikin jarida da rubuce-rubucenta kan yadda ake tauye haƙƙin mata. Daga cikin ayyukan da suka sa ta yi fice akwai wani bincikenta na 1963 da ta yi a ɓoye a matsayin ma’aikaciyar Playboy Club, inda ta rubuta kan yadda ake mu’amala da mata masu aikin wurin.
A shekarar 1971 ta taimaka wajen kafa mujallar Ms., wadda ta zama ɗaya daga cikin muhimman kafafen da suka bai wa mata damar magana kan batutuwan da suka shafe su. Ta kuma kasance cikin waɗanda suka kafa National Women’s Political Caucus da Ms. Foundation for Women.
Rubuce-rubucenta sun ƙara mata suna a matsayin marubuciya mai tasiri a cikin gwagwarmayar kare haƙƙin mata. Daga cikin littattafanta akwai ‘Outrageous Acts and Everyday Rebellions’, ‘Revolution from Within’, ‘Moving Beyond Words’ da ‘My Life on the Road’, waɗanda suka tattauna batutuwan da suka shafi mata, siyasa, rayuwa da sauyin al’umma.
A shekarun baya ma Steinem ba ta janye daga fafutukar da ta shafe rayuwarta a kai ba. Ta ci gaba da magana kan daidaiton jinsi, cin zarafin mata da sauran batutuwan da suka shafi ‘yanci da mutuncin ɗan Adam.
An ba ta lambar yabo ta Presidential Medal of Freedom a 2013, ɗaya daga cikin manyan lambobin yabo na farar hula a Amurka. Ta bar tarihi a matsayin ɗaya daga cikin fitattun marubuta da ‘yan gwagwarmayar da suka taimaka wajen sauya yadda ake kallon haƙƙin mata a Amurka.
