Daga SANI AHMAD GIWA a Abuja
Hukumar Alhazai ta Nijeriya (NAHCON) ta fara gudanar da horo na kwanaki biyu ga kamfanonin da ke da lasisin gudanar da aikin Hajji da Umrah a Kano da Legas, domin ƙarfafa bin ƙa’idojin aiki, inganta gudanar da ayyuka da kuma tabbatar da gamsuwar maniyyata gabanin Hajjin 2027.
Horarwar, mai taken Professional Certificate Programme in Hajj/Umrah Operations and Pilgrim Serɓice Management, ta gudana a ranakun Litinin, 26 ga Oktoba, da Talata, 27 ga Oktoba, 2026. Cibiyar Horo kan Aikin Hajji ta Nijeriya (HIN) ce ta shirya shirin tare da haɗin gwiwar ƙungiyar Masu Gudanar da Aikin Hajji da Umrah ta Nijeriya (AHUON) da kuma ƙungiyar Kamfanonin Yawon Buɗe Ido na Hajji da Umrah ta Nijeriya (HUTON).
Da yake buɗe shirin, Shugaban NAHCON, Ambasada Ismail Abba Yusuf, ya ce horon zai taimaka wajen shirya masu gudanar da aikin Hajji na Nijeriya domin tunkarar sauye-sauyen da ke faruwa a harkokin Hajji na duniya, sakamakon sauye-sauyen da Saudiyya ke aiwatarwa ƙarƙashin shirin ɓision 2030, da kuma sabon tsarin kasuwanci na Business-to-Business (B2B), wanda ke da nufin mayar da kula da alhazai zuwa hannun kamfanoni masu zaman kansu.
Ya bayyana cewa NAHCON ta cimma matsaya da hukumomin Saudiyya kan tsarin sauyi na tsawon shekaru uku, wanda za a aiwatar a matakai. A ƙarƙashin tsarin, kamfanoni masu zaman kansu za su fara da kaso na kashi 30 cikin 100 a shekarar 2027. Ya ce wannan zai ba Nijeriya damar ƙarfafa dokoki da ƙa’idojin gudanar da aikin Hajji, tare da shirya kamfanonin da ke aikin domin ɗaukar ƙarin nauyi.
Shugaban ya buƙaci masu gudanar da aikin Hajji da su kiyaye ƙa’idojin sana’arsu, yana mai jaddada cewa, “jin daɗin alhazai da kula da jin daɗinsu dole ne ya kasance a gaba da duk wata moriyar kasuwanci.” Ya kuma sake tabbatar da aniyar hukumar na inganta tsarin ba da takardar shaidar ƙwarewa, amfani da fasahar zamani wajen gudanar da ayyuka da kuma sa ido kan yadda ake bin ƙa’idoji.
A nasa jawabin, Shugaban HIN, Farfesa Muhammad Nasirudeen Maiturare, ya bayyana cewa horar da ƙwararru na da matuƙar muhimmanci wajen inganta tsarin gudanar da aikin Hajji na zamani. Ya jaddada buƙatar samun ƙwarewa a fannonin shugabancin kamfanoni, kula da haɗurra, daidaita ayyuka da kuma bin ƙa’idojin hidima na ƙasashen duniya.
Ya kuma bayyana shirye-shiryen karatu da HIN ke gudanarwa, ciki har da shirin digiri na biyu na MBA a fannin Gudanar da Ayyukan Hajji, tare da haɗin gwiwar Jami’ar Ahmadu Bello da ke Zariya, da kuma Difloma ta ƙasa a fannin Baƙuncin Baƙi da Gudanar da Aikin Hajji, tare da haɗin gwiwar Hukumar Kula da Ilimin Fasaha ta ƙasa.
Shirin horon ya ƙunshi darussa kan ɗabi’un sana’a, haɗa ayyuka da gudanar da su, darussan da aka koya daga Hajjin 2026, jagoranci, warware rikice-rikice, kula da jin daɗin alhazai da kuma haɗin gwiwa da masu ba da hidima a Saudiyya.
Ana sa ran wannan horo zai ƙara wa masu gudanar da aikin Hajji shiri da ƙwarewa domin Hajjin 2027, tare da tallafa wa ƙoƙarin NAHCON na gina ingantacciyar masana’antar Hajji da Umrah wadda za ta kasance mai gogayya da sauran ƙasashe, tare da bai wa alhazai fifiko wajen gudanar da ayyukanta.
