Daga AISHA ASAS
Yayin da neman mafita daga matsin rayuwa ke ci gaba da tura mutane daga ƙasashensu zuwa wasu wurare domin neman ingantacciyar makoma, wani mummunan hatsarin kwale-kwalen da ke ɗauke da bakin haure ya yi sanadin mutuwar mutane akalla 39 a gaɓar tekun Senegal.
Rahoton kamfanin dillancin labarai na Reuters na ranar 9 ga Nuwamba, 2026, ya bayyana cewa kwale-kwalen ya nutse ne a kusa da garin Kebemer, wanda ke da tazarar kusan kilomita 180 daga birnin Dakar, babban birnin ƙasar.
A farkon faruwar lamarin, ma’aikatar harkokin cikin gida ta Senegal ta sanar da mutuwar mutane 21, tare da samun mutum guda da ya tsira daga hatsarin.
Sai dai yayin da jami’an ceto ke ci gaba da gudanar da bincike, adadin waɗanda suka mutu ya ƙaru zuwa 39, kamar yadda kamfanin dillancin labaran ƙasar Senegal (APS) ya tabbatar.
Rahoton ya kuma bayyana cewa an gano wasu gawarwaki huɗu a safiyar Litinin, waɗanda tuni suka fara lalacewa, kafin daga bisani jami’an kashe gobara su gudanar da addu’ar jana’izarsu.
Ko da yake ba a bayyana ainihin adadin mutanen da ke cikin kwale-kwalen ba, bayanai sun nuna cewa mutanen na ƙoƙarin yin hijira ne ta hanyar teku zuwa Turai, musamman yankin tsibirin Canary na ƙasar Spain.
Wannan hanya ta tekun Atlantika na daga cikin hanyoyin hijira mafi haɗari da bakin haure ke bi domin shiga Turai, inda dubban mutane suka rasa rayukansu a cikin shekarun baya.
Lamarin ya kuma sake buɗe muhawara kan yadda gwamnatocin ƙasashen Afirka ke tafiyar da matsalar hijira ba bisa ƙa’ida ba, musamman ganin yadda ƙungiyoyin kare haƙƙin bil’adama ke neman a gudanar da cikakken bincike kan matakan da ake ɗauka domin dakile irin waɗannan iftila’i.
