Daga SANUSI MUHAMMAD a Gusau
Jimillar ‘yan mata da matasa mata 1,868 sun kammala karatunsu daga rukunin farko na shirin ilimi na AGILE, Subcomponent 2.2C.
An gudanar da bikin kammala karatun ne a Otal din Falala da ke Gusau yau Alhamis.
Da take gabatar da jawabin maraba, mai kula da ayyukan AGILE na Zamfara Hajiya Sa’adatu Abdu Gusau, ta bayyana taron a matsayin damammaki da mata suka samu.
“An gudanar da shirin na tsawon watanni 10 a dukkan ƙananan hukumomi 14 na jihar,” in ji ta.
Ta bayyana cewa shirin ya haɗa ilimin karatu da lissafi tare da dabarun rayuwa, ilimin zamani da horar da sana’o’i a fannin kasuwanci don tabbatar da cewa ‘yan mata sun shirya don ƙarin koyo da kuma samun ‘yancin tattalin arziki.
Ta ƙara da cewa za a shirya zabar wasu ‘yan matan na gaba ta hanyar daidaiton jinsi, musamman nakasassu da haɗa kan jama’a ƙarƙashin ƙa’idojin GEDSI don tabbatar da cewa babu wata yarinya da aka bari a baya.
Kwamishinan Ilimi, Kimiyya da Fasaha Hon. Abdulmalik Gajam ya yaba da kammala karatun a matsayin shaida bayyananniya ta jajircewar Gwamnatin Jihar Zamfara wajen samar da ilimi mai inganci a ƙarƙashin Gwamna Dr. Dauda Lawal.
“Waɗanda suka kammala karatun daga cibiyoyin koyon aiki guda 20 a yanzu sun sami ilimin zamani, lissafi, dabarun rayuwa da ƙwarewar sana’a,” in ji kwamishinan.
“Wannan ƙwarewar za ta ba su damar ba da gudummawa mai ma’ana ga iyalansu, al’ummominsu, da kuma ci gaban jiharmu gaba ɗaya.”
Ya yaba wa hukumar aiwatar da ayyukan AGILE, masu gudanarwa, shugabannin al’umma da abokan hulɗa na ci gaba bisa jajircewar su wajen aiwatar da shirin.
Gajam ya bayyana cewa gwamnati za ta ci gaba da jajircewa wajen faɗaɗa wasu damarmakin koyo ga yara, matasa, mata, da sauran ƙungiyoyi masu rauni, bisa ga ajandar ci gaban ilimi ta gwamnatin Gwamna Dauda Lawal.
