Daga MAHDI MUSA MUHAMMAD
Sheikh Ibrahim bin Adel Al-Madani, ɗaya daga cikin masu kiran sallar Asuba da sauran salloli a Masallacin Harami da ke Makkah, ya rasu a safiyar Litinin yana da kimanin shekaru 51.
Tashar Al-Ekhbariya ta Saudiyya ce ta tabbatar da rasuwar, lamarin da ya janyo ɗimbin saƙonnin ta’aziyya da addu’o’i a shafukan sada zumunta.
Al-Madani na daga cikin manyan masu kiran salla da ke aiki a Masallacin Harami. A kowace rana, mutum shida daga cikinsu ne ke yin kiran salla a jere domin sallolin farilla biyar, da kuma kiran farko na sallar Asuba, wato Assalatu An fi saninsa da kiran sallar Asuba, da kuma jagorantar kiran takbirorin Idi, wato ladan.
Daga cikin ayyukansa akwai kuma tabligh, wato isar da kiran takbirorin liman daga dandalin masu kiran salla zuwa ga jama’ar da ke cikin Masallacin Harami, domin su ji yadda liman yake gudanar da sallar.
Kiran salla na ƙarshe da Al-Madani ya yi shi ne kiran farko na sallar Asuba a safiyar Litinin, sa’o’i kaɗan kafin rasuwarsa. Wani faifan bidiyo da shafin Inside the Haramain ya wallafa ya nuna yadda ya gudanar da kiran sallar.
An shirya yin sallar jana’izarsa bayan sallar La’asar a Masallacin Harami a ranar Litinin, kafin a binne shi a makabartar Al-Ma’alla.
Shugabancin Kula da Masallacin Harami da Masallacin Annabi, ƙarƙashin jagorancin Sheikh Abdul Rahman Al-Sudais, ya mika ta’aziyyarsa ga iyalan marigayin.
An haifi Al-Madani a Madinah a shekarar 1976, cikin iyali masu bin addini. Kakansa, wanda ya haddace Alƙur’ani, shi ne ya taka muhimmiyar rawa wajen tasiri a rayuwarsa. Daga bisani ya samu takardar shaidar karatu a fannin Nazarin Alƙur’ani.
Hanyar Al-Madani ta zama mai kiran salla ta fara ne tun yana da shekaru 15, lokacin da ya fara kiran salla a wani masallacin unguwa da ke Madinah.
Ya kasance yana yin aikin tare da wasu mazauna unguwarsu guda uku bisa tsarin juyawa, har zuwa lokacin da ya kammala karatunsa a jami’a. Daga nan ya ɗan dakata da kiran salla saboda aikin koyarwa da ya kai shi wajen birnin.
A shekara ta 1428 bayan hijira, wadda ta yi daidai da 2007 zuwa 2008, an gayyace shi ya koma aikin kiran salla a Masallacin Al-Maddah.
Daga baya, a shekara ta 1439 bayan hijira, wadda ta yi daidai da 2017 zuwa 2018, aka naɗa shi a hukumance a matsayin mai kiran salla a Masallacin Harami.
Al-Madani ya taso ne bisa al’adar kiran salla ta Madinah, amma ya saba da tsarin kiran salla na Makkah tun lokacin da yake tafiya Makkah tare da mahaifinsa.
A lokacin waɗannan tafiye-tafiyen ne ya haɗu da Sheikh Abdul Latif Mulla, wanda ya taɓa kasancewa cikin masu kiran salla a Masallacin Harami kuma abokin kakansa ne.
