Gwamnatin soja ta Burkina Faso ta sanar da dokar da ta haramta luwaɗi, tare da kafa hukuncin ɗaurin kurkuku na tsawon shekaru biyu zuwa biyar ga duk wanda aka samu da aikata irin wannan hali. Wannan mataki ya zama ɗaya daga cikin sabbin tsare-tsaren da gwamnati ta ɗauka wajen gyaran tsarin iyali da dokokin ɗan ƙasa.
Ministan Shari’a, Edasso Rodrigue Bayala, ne ya bayyana wannan doka a tashar talabijin ta ƙasa (RTB). A cewarsa, “Doka ta tanadi ɗaurin kurkuku daga shekara biyu zuwa biyar tare da tara mai tsoka. Idan wani ya aikata luwaɗi ko makamancinsa, ko wasu ɗabi’un da ake ganin sun saɓa wa al’ada, zai gurfana gaban kotu.”
Ya ƙara da cewa, ƙasashen waje da aka samu da wannan laifi za a fitar da su daga ƙasar ba tare da jinkiri ba.
Dokar ta samu amincewar mambobi 71 na majalisar wucin gadi, wacce ke riƙe da ikon dokoki tun bayan juyin mulkin soja sau biyu da aka yi a ƙasar a shekarar 2022. Gwamnati ta bayyana cewa za ta gudanar da kamfen na wayar da kai don sanar da jama’a muhimmancin wannan doka da dalilin ƙarfafa ta.
Hukuncin ya biyo bayan irin matakan da wasu ƙasashen Afirka suka ɗauka, musamman Mali, abokiyar ƙawancen Burkina Faso wacce ita ma ke ƙarƙashin mulkin soja, da ta zartar da irin wannan doka a watan Nuwambar 2024.
Rahotanni sun nuna cewa luwaɗi har yanzu bai samu karɓuwa ba a ƙasashen Afirka da dama. A halin yanzu, kusan ƙasashe 30 a nahiyar sun haramta shi ta hanyar doka.
Ghana da Uganda sun tsaurara dokokinsu cikin ‘yan shekarun nan duk da kakkausar suka daga ƙasashen yamma.
A Uganda, dokar da aka amince da ita ta tanadi hukuncin kisa ga abin da aka kira “luwaɗi mai tsanani” (aggravated homosexuality) tare da ɗaurin rai da rai ga ma’aurata da suka aikata hakan da yardar juna.
Burkina Faso ta zama ƙasar Afirka ta yamma ta ƙarshe da ta bi wannan hanya, abin da ke ƙara haifar da muhawara tsakanin masu kare haƙƙin ɗan adam da kuma gwamnatocin soja da ke bayyana cewa suna tsare al’adu da darajoji na gargajiya.
