Daga BELLO A. BABAJI a Abuja
Hukumar Hana yi wa Tattalin Arziƙin Ƙasa Ta’annati (EFCC) yaƙi ta kama jarumar Kannywood, Samha M Inuwa bisa zargin ta da ayyukan wulaƙanta takardar naira.
A sanarwar da EFCC ta wallafa a shafinta na X, ta ce ta kama Samha ne a jiya Talata bayan samun wani bidiyo da ya karaɗe shafukan sada zumunta da ya nuna yadda take share majina da takardar kuɗi na N1,000.
A cewarta, hakan ya sanya ta gaggauta kama Samha bayan fitar bidiyon, inda aka cafke ta don ta je ta amsa tambayoyi.
EFCC ta ƙara da cewa, a yanzu tana tsare da jarumar yayin da ake cigaba da gudanar da bincike akan al’amarin.
Kazalika, EFCC ta ce za a tura jarumar zuwa kotu da zarar an kammala bincike domin ta fuskanci hukuncin doka.
