Daga NASIR S. GWANGWAZO a Abuja
Daya daga cikin matan fitaccen mawaƙin ƙasar Hausa, Marigayi Mamman Shata, wato Hajiya Binta Shata ta kwanta dama a ranar Laraba, 28 ga Janairu, 2026.
Bayanin hakan ya fito ne daga ɗaya daga cikin masana rayuwar Marigayi Shata, wato Hussaini Dogo, a kafafen sadarwa, musamman a zauren Makaɗa da Mawaƙa a ranar Laraba.
Ya ce, “Allah ya yi wa ɗaya daga cikin matar Dr. Alhaji Mamman shata Katsina rasuwa, Hajiya Binta, mahaifiyar su Jamila Shata, yanzun nan. Za a yi jana’izarta an jima a ‘Central Mosƙue’ Abuja bayan sallar la’asar. Muna roƙon Allah ya jikan ta da rahama.”
a shekara ta 1999 Allah ya karɓi rayuwar Mamman Shata, mawaƙin da ake kallo a matsayin ba a yi tamkarsa ba a ƙasar Hausa, kimanain shekara a 27 kenan da rasuwarsa, inda ya bar ’ya’ya da jikoki da dama bayan matansa, waɗanda Marigayiya Binta Shata ke cikinsu.
Tuni dai aka yi jana’aizarta kamar yadda addinin Islama ya tanada.
