Daga MAHDI MUSA MUHAMMAD
Matatar man Ɗangote tana jiran gangar ɗanyen mai miliyan 12 daga Amurka, inji rahoton Africa a ranar Litinin.
Matatar ta koma shigo da ɗanyen mai ne yayin da ƙalubalen samar da kayayyaki a cikin gida ya hana sabuwar matatar ta dala biliyan 20 cimma cikakkiyar ƙarfinta na tace mai.
Idan za a iya tunawa, matatar ta yi shirin kaiwa ga tace ganga 650,000 a kowace rana a watan Yuni na wannan shekara.
Sai dai kuma, ƙarancin ɗanyen mai a cikin gida daga Kamfanin Man Fetur na Nijeriya a halin yanzu yana zama ƙalubale ga wannan shiri na bunƙasa samar da mai na yau da kullum.
Ganga miliyan 12 na ɗanyen man dai tuni ya bar Amurka kuma zai sauka a Nijeriya a wata mai zuwa kamar yadda rahoton ya bayyana.
“Kusan ganga miliyan 12 na ɗanyen mai ya bar Amurka kuma ya kamata ya isa Nijeriya nan da watan Fabrairu,” wata majiya mai tushe ta shaida wa The Africa Report.
An ruwaito cewa matatar man Dangote tana ƙara shigo da ɗanyen mai ne saboda ƙarancin man da ake samu daga NNPC ya gaza samar da mai a gidan da ke Lekki na dala biliyan 20.
Jami’ai a masana’antar sun ce cibiyar ta ƙara haɓaka samar da ganga kusan ganga 500,000 a kowace rana, inda ake sa ran kaiwa ga maki 650,000 a cikin watan Yuni na wannan shekara.
Yayin da yake tabbatar da cewa har yanzu cinikin ɗanyen mai a naira yana nan kamar yadda shugaban ƙasa Bola Tinubu ya bada umarni a shekarar da ta gabata, wasu majiyoyi sun shaida cewa, cibiyar za ta ƙara shigo da ɗanyen mai domin cimma burin ta.
Rahotanni sun bayyana cewa, NNPC na ƙoƙarin samar da ganga 350,000 ga matatar Dangote daga cikin ɗanyen mai mai nauyin bpd450,000 da aka tanada domin amfanin gida Nijeriya.
