Daga MAHDI MUSA MUHAMMAD
Kwamandan-Janar na Hukumar Tsaro da Kare Fararen Hula ta Nijeriya (NSCDC), Farfesa Ahmed Abubakar Audi, ya tabbatar wa iyalan mutane 37 da suka mutu a hannun hukumar a Minna, Jihar Neja, cewa ba zai tsoma baki ko katsalandan cikin binciken da ake gudanarwa kan lamarin ba.
Audi ya bayyana hakan ne a yayin wata ziyarar ta’aziyya da girmamawa da ya kai wa iyalan waɗanda suka mutu, iyalan wasu daga cikin masu haƙar ma’adinan da suka tsira, da kuma Sarkin Minna, Mai Martaba Alhaji (Dr.) Umar Farouk Bahago.
A cikin wata sanarwa da Jami’in Hulɗa da Jama’a na ƙasa na NSCDC, Mataimakin Kwamandan Runduna (ACC) Babawale Afolabi, ya fitar, ya ce ziyarar Kwamandan-Janar ɗin ta kasance ne domin ya jajanta wa iyalan mamatan da waɗanda suka tsira, tare da nuna goyon baya ga al’ummar Minna a wannan lokaci na jimami.
Ya kuma ce Audi ya tabbatar musu cewa hukumar za ta ba da cikakken haɗin kai ga binciken da ake gudanarwa kan lamarin.
Kwamandan-Janar ɗin ya ce, NSCDC za ta yi cikakken haɗin gwiwa da kwamitin binciken, kuma ba za ta kare wani jami’i ko mutum da aka samu da hannu ko alhakin mutuwar masu haƙar ma’adinan ba.
Ya jaddada cewa gaskiya, adalci da bayyana gaskiya za su zama ginshiƙan binciken domin gano abin da ya jawo mummunar asarar rayukan.
Audi ya ce, “Ina tabbatar wa iyalan cewa NSCDC ba za ta tsoma baki cikin binciken ba. Duk wanda aka samu da laifi ba za a kare shi ba.”
A cewar NSCDC, ziyarar ta kuma ba Kwamandan-Janar damar nuna wa iyalan mamatan da al’ummar Minna cewa hukumar na tare da su a lokacin wannan babban rashi.
Da yake magana kan babban binciken da ake gudanarwa kan lamarin, Audi ya bayyana cewa Gwamnatin Tarayya, bisa umarnin Fadar Shugaban ƙasa, ta kafa wani babban kwamitin bincike domin gano haƙiƙanin abin da ya faru da kuma yanayin da ya kai ga mutuwar masu haƙar ma’adinan.
Ya ce, NSCDC tana ba kwamitin cikakken haɗin kai, tare da ɗaukar matakan tabbatar da cewa jami’an da abin ya shafa sun kasance a shirye domin amsa tambayoyin da kwamitin zai gabatar musu yayin binciken.
“NSCDC ta ƙuduri aniyar tabbatar da gaskiya da riƙon amana. Na yi alkawarin ba zan tsoma baki cikin tsarin binciken ba, kuma duk wanda aka samu da hannu a lamarin ba za a kare shi daga bincike ko kuma matakin shari’a ba,” inji shi.
A cewarsa, tuni aka sanya wasu jami’an da ke da alaƙa da lamarin a wani wuri na tsarewa domin a samu damar yi musu tambayoyi cikin gaskiya da ’yanci, sannan idan ya zama dole a gurfanar da su gaban kotu.
Ya ce, “Muna ba kwamitin cikakken haɗin kai ne saboda muna son gaskiya ta fito fili. Dole ne tsarin ya kasance a bayyane, kuma a bar adalci ya yi aikinsa.”
Sanarwar ta ƙara da cewa, ziyarar Audi tana da ma’anar addini, domin ya halarci addu’o’in da Musulmi suka gudanar domin neman rahamar Allah ga mamatan, da kuma roƙon Ya ba iyalansu ƙarfi da haƙurin jure wannan babban rashi.
Ya kuma bayyana muhimmancin addu’o’in uku da bakwai da ake yi wa mamaci, yana mai cewa kasancewarsa a wajen addu’o’in wani ɓangare ne na nuna goyon baya da juyayi ga iyalan mamatan da kuma ɗaukacin al’ummar Minna.
Mutuwar masu haƙar ma’adinan 37 ta jefa iyalansu da al’ummar yankin cikin jimami, yayin da har yanzu ake ci gaba da bincike domin gano ainihin abin da ya haddasa mutuwarsu.
Da yake mayar da martani a madadin masarautar Minna da iyalan mamatan, Sarkin Minna, Mai Martaba Alhaji (Dr.) Umar Farouk Bahago, ya nuna godiya ga Audi bisa yadda ya ziyarci al’ummar da kansa tare da jajanta wa iyalan a wannan lokaci mai matuƙar wahala.
Sarkin ya kuma yaba da matakan gudanarwa da NSCDC ta ɗauka bayan faruwar lamarin, da kuma haɗin gwiwar da hukumar ke bai wa kwamitin binciken da Fadar Shugaban ƙasa ta kafa.
Ya bayyana ziyarar Kwamandan-Janar ɗin a matsayin muhimmiyar alama, musamman ganin yadda ta nuna cewa hukumar na hulɗa kai tsaye da iyalan waɗanda abin ya shafa da kuma al’ummar yankin.
Sarkin ya gode wa Audi bisa ganin dacewar zuwa Minna da kansa domin jajanta wa iyalan mamatan, tare da shiga addu’o’in da aka yi domin roƙon Allah Ya jiƙan waɗanda suka rasu.
Ziyarar Audi ta zo ne a daidai lokacin da ake ci gaba da bincike kan yanayin da ya kai ga mutuwar masu haƙar ma’adinan, yayin da NSCDC ke jaddada cewa ya kamata a bar hukumomin da ke gudanar da binciken su gano gaskiyar lamarin tare da tantance waɗanda ke da alhaki.
Hukumar ta ce, za ta ci gaba da ba da cikakken haɗin kai ga tsarin binciken, tare da mutunta buƙatar gudanar da cikakken bincike cikin gaskiya da adalci.
