Daga BELLO A. BABAJI a Abuja
Bayan shafe sama da shekaru 20 yana wakiltar Ajantina, zakaran ɗan wasan ƙwallon ƙafa na duniya Lionel Andres Messi Cuccittini, ya kammala wakiltar ƙasar da zura ƙwallo ɗaya da bayar da biyu da aka ci a wasansu da Jamhuriyar Benin a birnin Buenos Aires na ƙasar kudancin Amurka.
Messi, mai shekaru 39 ya buga wasansa na 208 a matakin ƙasa-da-ƙasa kuma na ƙarshe, inda ya zura ƙwallon 126 a rigar Ajantina a bugun fenareti. Da fari, ya taimaka Nicolas Otamendi da Nico Paz sun zura ƙwallo guda kowannensu a wasan ƙawancen da aka tashi ci 3 da 0.
Fitaccen ɗan wasan, wanda ya sanar da yin ritaya tun a watan Agusta, 2026 ya buga wasan na tsawon minti 90 a gaban jimillar masu kallo mutum 85,000, inda aka nishaɗantar da su da waƙa da wasu nau’ukan gabatarwa. Ya kuma yi wa dandazon jama’ar jawabin kusan minti 10, inda aka ga wasu abokan wasansa, ciki har da Enzo Fernandez na Manchester City cikin ƙwalla yayin da Messi yake bayyana cewa bai so barin tawagar ba.
Bayan minti goma da take wasan, an dakatar da shi yayin da aka sake karrama Messi, inda jama’ar filin suka miƙe tsaye sannan ya samu yin musabaha da baki ɗaya ‘yan wasan Benin.
Tsohon ɗan wasan na Barcelona da Paris Saint-Germain (PSG) zai cigaba da wakiltar ƙungiyar Inter Miami a gasar Major League Soccer, wadda yake da yarjejeniyar kwantaragi da ita har zuwa ƙarshen kakar 2028. A ranar 21 ga Yuli ne Messi, wanda ya lashe kyautar Ballon d’Or sau takwas a tarihinsa kuma mafi yawa daga wani ɗan wasa, ya rubuta wasiƙarsa ta ritaya, kwana biyu da ƙasarsa ta rasa wasan ƙarshe na Kofin Duniya a hannun Sifaniya.
Kazalika, a shekarar 2005 ne Messi ya fara wakiltar Ajantina a wasanta da ƙasar Hungary, inda aka sako Messi a minti na 63 kuma suka yi nasara da ci 2 da 1. Saidai ya samu jan kati a wasan sakamakon wani mummunan hari ya kai wa ɗan wasan baya, Vilmos Vanczak. Duk da wannan ƙalubale, Messi ya zama ɗaya daga cikin ‘yan wasa mafi samun nasara a tarihin ƙwallon ƙafa, inda ya lashe kofin duniya a 2022 da Copa America guda biyu da kuma Finalissima da ƙasar tasa.
Haka kuma, shi ne mafi zura ƙwallo na biyu a tarihin gasar kofin duniya da ƙwallo 21 yayin da Kylian Mbappe na Faransa yake da 22. Sannan shi ne na biyu a mafi yawan ƙwallaye a tarihin wasannin ƙasa-da-ƙasa, inda ya zura guda 125 yayin da abokin hamayyarsa na Portugal, Cristiano Ronaldo yake da 146.
