Daga BELLO ABUBAKAR BABAJI
Hukumar kula da ɗalibai masu hidimar Ƙasa, NYSC ta bai wa matan aure da aka tura su jihohin da ba a nan mazajensu suke ba dama ta su nemi a sauya mu su jiha.
NYSC ta fitar da sanarwar ne ta shafinta na kafar X inda ta ce matan za su je sansanin hukumar mafi kusa tare da takardunsu don a canja mu su zuwa wajen da su ke so su yi hidimar.
Ta ce, da zarar an gama sauya wa mutum inda ya nema, zai ga hakan a shafinsa na hukumar.
An samar da NYSC ne a ranar 22 ga watan Mayu, 1973 don sanya ɗaliban da suka kammala karatun jami’o’i da makamantansu cikin sahun waɗanda ke ƙoƙarin samar da ci gaba wa ƙasa.
