Hedikwatar tsaro ta ce tana ci gaba da gudanar da bincike kan zargin ɗaukar nauyin ‘yan ta’adda a yankin Arewa maso Yamma musamman Jihar Zamfara.
Daraktan yaɗa labarai na hukumar ta DHQ, Manjo Janar Edward Buba ne ya bayyana hakan a ranar Alhamis a wani taron manema labarai a Abuja, inda ya tabbatar da cewa hukumomin da abin ya shafa da ke da alhakin gudanar da irin wannan aiki suna gudanar da bincike sosai kan lamarin.
Wannan ci gaban ya biyo bayan zarge-zargen da ake yi tsakanin ƙaramin ministan tsaro kuma tsohon gwamnan Jihar Zamfara, Bello Matawalle da magajinsa Dauda Lawal, kan ɗaukar nauyin ‘yan ta’adda.
A ranar Talata, Matawalle ya ƙalubalanci Lawal da ya rantse da Alkur’ani mai girma cewa ba shi da hannu a ɗaukar nauyin ‘yan ta’addan.
Da yake mayar da martani, Lawal ya sha alwashin fitar da hujjojin da ake tuhumar ministan, ya kuma ƙara da cewa ya kuma kai rahoto ga mai baiwa shugaban ƙasa shawara kan harkokin tsaro da kuma shugaban ƙasa Bola Tinubu.
Da aka tambaye shi game da rawar da sojoji suka taka game da zarge-zargen da suka shafi jiga-jigai biyu, kakakin DHQ, Buba, ya ce ana duba lamarin.
“Lokacin da kuke magana game da abubuwan da ke faruwa game da masu ɗaukar nauyin, zan iya tabbatar muku cewa hukumomin da suka dace da ke da alhakin wannan nauyin suna yin aiki mai kyau. Kuma nan ba da jimawa ba, za ku ji wasu sanarwa game da hakan inji shi.
