Daga BELLO A. BABAJI
Shahararren ɗan wasan ƙwallon ƙafa na duniya, Cristiano Ronaldo ya kafa sabon tarihi bayan samun jimillar mabiya biliyan ɗaya a shafukansa na sada zumunta.
Ganin haka ya sa Ronaldo yi yi godiya ga magoya bayansa tare da jinjina mu su kan soyayyar da suke nuna masa a lokacin da ya ke haskawa a fagen ƙwallo.
Ronaldo, wanda a halin yanzu ɗan wasa ne na ƙungiyar AL Nassr ta ƙasar Saudiyya, ya bayyana a shafinsa na X cewa hakan ya samu ne sakamakon soyayyar da shi da magoya bayan nasa ke wa tamola.
Ɗan wasan yana da mabiya sama da miliyan 638 a Instagram, a Facebook miliyan 170, a X (Twitter) kuma miliyan 113 yayin da kuma aka samu waɗanda suka yi rijista guda miliyan 60.7 a YouTube da sauransu.
Ya kuma tabbatar wa mabiyan cewa zai cigaba da kafa tarihi a yayin kasancewar sa a cikin filin wasa da ma wanin sa a nan gaba.
