Daga BELLO A. BABAJI a Abuja
Shugaba Bola Tinubu ya umarci a dawo da Salihu Abdullahi Demos kan muƙamin darakta-janar na gidan talabijin na NTA a yau Talata.
Dembos ya bar muƙamin ne a kwanan nan bayan wasu ƴan gyare-gyare da aka yi wa hukumar gudanarwar gidan talabijin ɗin.
A watan Oktoban 2023 Shugaba Tinubu ya naɗa Dembos a muƙamin, inda a yanzu zai dawo domin kammala wa’adinsa na shekara uku.
Kamar haka ne Shugaban Ƙasar ya umarci a dawo da Ayo Adewuyi, wato daraktan yaɗa labarai kan muƙaminsa domin cika zangonsa na shekara uku, wanda zai ƙare a 2027.
Hakan na nufin an rushe naɗin tawagar jagororin gidan talabijin ɗin da gwamnati ta yi a makon da ya gabata.
