Daga SANI AHMAD GIWA a Abuja
Hukumar Shirya Jarabawar Afirka ta Yamma (WAEC) ta buɗe rajistar jarabawar kammala sakandare ta Afirka ta Yamma (WASSCE) ta shekarar 2027 ga ɗaliban da za su rubuta jarabawar ta hannun makarantunsu.
Hukumar ta sanar da fara rajistar ne a cikin wata sanarwa da ta wallafa a shafinta na hukuma ranar Talata, inda ta buƙaci makarantu su fara shirye-shiryen da suka dace tun kafin lokacin jarabawar.
WAEC ta bayyana cewa buɗe rajistar wani ɓangare ne na shirye-shiryen gudanar da jarabawar WASSCE ta 2027, tare da kira ga makarantu da su tabbatar da gabatar da duk bayanan da ake buƙata cikin wa’adin da aka ƙayyade.
Hukumar ta ce: “An buɗe rajistar jarabawar WASSCE ta 2027 ga ɗaliban makarantu. WAEC na ƙoƙarin samar da hanyoyin shirya jarabawa cikin sauƙi da sauƙaƙa samun damar shiga tsarin.”
Ta kuma buƙaci makarantu su gaggauta loda sakamakon tantance ɗalibai a kai a kai (Continuous Assessment Scores), tare da bin duk wa’adin rajistar da aka tsara.
Ana sa ran wannan umarni zai ba makarantu da ɗalibai damar kammala dukkan matakan rajista da ake buƙata kafin lokacin jarabawar ta 2027.
Haka kuma, WAEC ta bayyana cewa za a gudanar da jarabawar WASSCE ta 2027 ga ɗaliban makarantu ta tsarin haɗaka (hybrid mode), a wani mataki na ci gaba da sauya tsarin jarabawar zuwa amfani da kwamfuta.
Hukumar ta ce: “Muhimmin bayani: Za a gudanar da jarabawar ta 2027 ta tsarin haɗaka.”
Wannan mataki ya biyo bayan fara shigar da tsarin jarabawar kwamfuta a hankali da WAEC ta yi, domin zamanantar da yadda ake gudanar da jarabawa, inganta sahihancin sakamako da rage maguɗin jarabawa.
WAEC ta fara sauya tsarin jarabawarta zuwa na kwamfuta ne a shekarar 2024, lokacin da ta fara amfani da tsarin haɗaka ga masu jarabawar zaman kansu.
A ƙarƙashin wannan tsari, ɗalibai suna amsa tambayoyin zaɓi (objective) ta kwamfuta, yayin da ake gudanar da jarabawar rubutattun amsoshi da ta aikace-aikace da hannu.
Daga baya, hukumar ta sanar da shirinta na faɗaɗa amfani da tsarin jarabawar kwamfuta ga ɗaliban makarantu, a wani ɓangare na ƙoƙarin zamanantar da jarabawar WASSCE da ake gudanarwa a watan Mayu da Yuni.
WAEC ta bayyana cewa sauyin tsarin zai taimaka wajen magance wasu matsalolin gudanar da jarabawar takarda, tare da inganta inganci da sahihancin tantance ilimin ɗalibai.
A watan Oktoban 2025, Shugaban Ofishin WAEC na ƙasa, Dakta Amos Dangut, ya bayyana cewa amfani da tsarin jarabawar kwamfuta zai taimaka wajen rage maguɗi da sauran laifuffukan da ake aikatawa yayin jarabawa.
Dangut ya ce ƙwarewar hukumar a jarabawar da ta gudanar ta hanyar kwamfuta a baya ta nuna raguwar maguɗi da kuma ingantuwar ƙwarewar ɗalibai.
Ya bayyana cewa tsarin jarabawar kwamfuta zai rage damar aikata maguɗi, tare da sa gudanar da jarabawar ya fi sauƙi da inganci.
Hukumar ta kuma shirya samar wa makarantu damar amfani da wani shafin gwaji (testing portal), domin ɗalibai su saba da tsarin jarabawar kwamfuta kafin rubuta ainihin jarabawar.
Saboda haka, jarabawar WASSCE ta 2027 za ta kasance wani ɓangare na ci gaba da sauya tsarin jarabawa zuwa amfani da fasahar zamani a yankin Afirka ta Yamma.
