Daga MAHDI MUSA MUHAMAMD
An sake samun wani sabon salo na sauya sheƙar siyasa a Majalisar Wakilai ta Tarayya, inda aƙalla ’yan majalisa 27 suka sauya jam’iyyunsu zuwa wasu daban-daban, lamarin da ke nuna yadda ake ƙara yin gyare-gyare da sauyin tsari gabanin zaɓen shekarar 2027.
Rahotanni sun bayyana cewa Shugaban Majalisar Wakilai, Tajudeen Abbas, ne ya karanta wasiƙun sauya sheƙar a zaman majalisa na ranar Talata, inda aka tabbatar da wannan babban sauyi a zauren majalisar da ake kira “Green Chamber”.
Daga cikin ’yan majalisar da suka sauya jam’iyya, guda 14 sun koma jam’iyyar APC, yayin da guda 8 suka koma jam’iyyar ADC. Waɗanda suka shiga ADC sun haɗa da ’yan majalisa 5 daga jam’iyyar PDP, 2 daga Labour Party (LP), da kuma 1 daga APC.
Haka kuma, jam’iyyar APP ta samu ƙarin mambobi guda 2, yayin da jam’iyyar Accord Party ita ma ta karɓi ’yan majalisa guda 2 daga PDP.
’Yan majalisar da suka sauya jam’iyya sun bayyana cewa rikice-rikicen cikin gida da ke addabar tsofaffin jam’iyyunsu ne ya tilasta musu ɗaukar wannan mataki.
Wannan sabon sauyi na zuwa ne a daidai lokacin da ake shirin tunkarar zaɓen 2027, inda ake ganin jam’iyyun siyasa na ƙoƙarin ƙarfafa matsayinsu ta hanyar jawo ’yan majalisa da manyan ’yan siyasa zuwa cikinsu.
Masana harkokin siyasa na ganin wannan lamari a matsayin wata babbar alama ta cewa za a iya samun sauye-sauye masu girma a taswirar siyasar Nijeriya nan da ’yan shekaru masu zuwa, musamman idan aka yi la’akari da yadda jam’iyyun ke fafatawa wajen ƙarfafa tasirinsu a Majalisar Tarayya.
A cewarsu, yawaitar sauya sheƙa na iya zama barazana ga daidaiton siyasa, amma a lokaci guda yana nuna yadda tsarin dimokuraɗiyya ke aiki, inda ’yan siyasa ke da ’yancin zabar inda suke ganin zai fi musu anfani.
A ƙarshe, ana sa ran wannan yanayi zai ci gaba da sauyawa yayin da ake ƙara matsowa kusa da babban zaɓen ƙasa, inda al’ummar Nijeriya za su sake zaɓar shugabanninsu.
