Daga SANI AHMAD GIWA a Abuja
Rundunar ‘yan sanda a jihar Delta ta gabatar da mutum 30, waɗanda ake zargi da aikata manyan laifuka ciki har da fashi da makami, da garkuwa da mutane da ‘yan ƙungiyar asiri da kisan kai da sauransu.
‘Yan sandan sun kuma ce sun samu nasarar ansar bindigogi 150 ciki har da AK-47 guda 32.
Kwamishinan ‘yan sanda a jihar, Abaniwonda Olufemi, ya bayyana haka a ranar Talata a yayin wani jawabi da ya yi wa ‘yan jarida a shalkwatarsu da ke Asaba.
Daya daga cikin laifukan da ya yi bayani a kai akwai na kisan wani jariri ɗan wata 10 wanda aka bayar da rahoton ɓatansa a ranar 4 ga watan Disamba, 2024.
‘Yan sandan sun samu nasarar gano gawar yaron a cikin rafin Aɓiara.
“A lokacin da ake bincike, mahaifiyar yaron ta amsa cewa ita ce ta jefa yaron cikin rafi a ranar 31 ga watan Nuwamban 2024.
Ana ci gaba da tsare wadda ake zargin.
“An kama waɗanda ake zargin a watannin da suka gabata, sai dai mun samu ƙalubale, amma an samu goyon bayan sauran jami’an tsaro, da masu ruwa da tsaki da kuma al’ummar Delta wajen dawo da zaman lafiya a yankin, ” inji Abaniwonda Olufemi.
