A cikin sakamakon farko na zaɓen ƙananan hukumomin babban birnin Tarayya Abuja, jam’iyyar ADC ta samu nasara a mazabar 076, Sani Abacha Estate – Wuse Zone 4, a Abuja Municipal Area Council (AMAC).
Rahotanni sun nuna cewa adadin masu jefa ƙuri’a ya yi ƙasa sosai, inda mutane 10 kacal suka kaɗa ƙuri’a. Daga cikinsu, ADC ta samu 7 ƙuri’u, APC 2, yayin da 1 ƙuri’a ta kasance lalatacciya.
Dan takarar ADC, Dr. Moses Paul, ya bayyana cewa rashin halartar masu jefa ƙuri’a ya kasance abin mamaki, kuma ya danganta hakan da takunkumi da tsangwama da wasu suka fuskanta, duk da cewa jami’an zabe sun bi ka’idojin zabe yadda ya kamata.
Wannan nasara ta ADC a wannan akwatin ɗin na farko alamar tarihi ce, amma ba ta wakilta sakamakon ƙarshe na dukkan ƙananan hukumomi a FCT ba.
Ana sa ran karin sakamakon wasu akwatinan ɗin za su bayyana yayin da zabe ke ci gaba a sauran wurare na AMAC da sauran ƙananan hukumomi na FCT.
Babban Birnin Tarayya tana da ƙananan hukumomi guda shida — AMAC, Abaji, Bwari, Gwagwalada, Kuje, da Kwali tare da cibiyoyin akwatinan zabe 2,822 da kuma masu jefa ƙuri’a sama da miliyan 1.68.
Ana gudanar da zaɓe don kujerun shugaban ƙananan hukumomi da mataimakin shugaban, da na majalisar ƙananan hukumomi a mazaɓu 62.
