Daga SANI AHMAD GIWA a Abuja.
Aƙalla manyan hafsoshi goma sha shida ne rundunar Sojin Nijeriya ta tsare bisa zarginsu da shirya juyin mulki don hamɓarar da Shugaba Bola Tinubu, kamar yadda majiya mai tushe ta shaida wa Sahara Reporters.
Juyin mulki wani yunƙuri ne da wata tawagar soji ko wasu jiga-jigan gwamnati ke yi na tsige wani mutum da ke kan karaga ko shugabanci.
Yayin da rundunar sojin Nijeriya a cikin wata sanarwa da ta fitar a kwanakin baya ta ce tsare jami’an na da nasaba da rashin nasarar jarrabawar ƙarin girma da ake yi a wasu lokutan aiki, wasu manyan majiyoyi sun bayyana cewa an kama su ne bisa wani yunƙurin juyin mulki.
“Rundunar Sojin Nijeriya na son sanar da jama’a cewa wani atisayen da sojoji suka yi a kai a kai ya yi sanadin cafke jami’ai goma sha shida kan rashin ɗa’a da kuma saɓa ƙa’idojin aiki,” inji daraktan yaɗa labarai na rundunar, Birgediya Janar Tukur Gusau a wata sanarwa mai cike da ruɗani.
“Bincike ya nuna cewa ƙorafe-ƙorafensu ya samo asali ne musamman daga yadda suke ganin an danne ci gaban aikinsu, sakamakon yawan faɗuwa da suke yi a jarrabawar ƙarin girma, da kuma wasu dalilai daban-daban.
“Wasu daga cikin jami’an da aka kama sun kasance ƙarƙashin hukuncin laifuka daban-daban, ko dai suna jira ko kuma suna fuskantar shari’a, ana ganin halayensu bai dace da ƙa’idojin aikin soja ba.”
Sai dai wani babban jami’in hukumar leƙen asiri ta tsaro da ke da hannu a kamen ya shaidawa Sahara Reporters cewa jami’an da wani Birgediya Janar na soji ke jagoranta na shirin yin juyin mulki da kuma ƙwace mulki daga hannun ‘yan siyasa.
Ya ce an daƙile yunƙurin juyin mulkin ne bayan tattara bayanan sirri da hukumar DIA da abokan aiki suka yi.
Majiyar ta shaida wa Sahara Reporters cewa: “Jami’ai 16 na shirin yin juyin mulki ne kawai, jami’an sojan sun yi ta diflomasiyya ne kawai a cikin sanarwar da kakakin ya fitar, sun fara yin ganawar sirri kan yadda za a yi juyin mulki a kan yadda za a hamɓarar da shugaban ƙasa da sauran manyan jami’an gwamnati.
“Dukkansu jami’ai ne da ke da muƙamin Kyaftin zuwa Birgediya-Janar kuma har yanzu suna tsare a DIA kamar yadda muke zantawa da su, kwanan nan aka kama su a gidajensu daban-daban a faɗin ƙasar nan, babban burinsu shi ne su hamɓarar da Shugaba Tinubu su sanar da gwamnatin soja.”
Wata majiyar ta ƙara da cewa an soke faretin ranar ‘yancin kai na ranar 1 ga Oktoba saboda yunƙurin juyin mulkin.
Ya ce, “Eh, an kama su ne da laifin shirin yin juyin mulki da kuma ƙwace mulki, wannan shi ne babban dalilin da ya sa aka soke faretin ranar ‘yancin kai da aka shirya gudanarwa a ranar Laraba 1 ga Oktoba a wani ɓangare na bikin cikar ƙasar shekaru 65 da samun ‘yancin kai.
“Hakan ya faru ne saboda bayanan sirri sun nuna cewa sun shirya juyin mulkin ne a ranar 1 ga Oktoba a lokacin da sojoji suka yi faretin, don haka mai ba shugaban ƙasa shawara kan harkokin tsaro da sauran manyan jami’an tsaro sun nemi gwamnatin Tinubu da ta soke faretin da aka shirya gudanarwa tun da farko.
“Shirin su shi ne su harbe shugaban ƙasa da wasu manyan ‘yan siyasa a yayin taron. Matakin da hukumomin sojan suka ɗauka na sanar da kama su shi ne don daƙile tashin hankali.”
Tun bayan da Nijeriya ta samu ‘yancin kai a shekarar 1960, an samu nasarar juyin mulkin soji guda biyar.
A baya-bayan nan dai an yi ta samun zarge-zargen cin hanci da rashawa a cikin rundunar sojin ƙasar wanda wasu daga cikin hafsoshi da sojoji ke zarginsu da rasa sha’awarsu ga sojojin ƙasar.
