Daga BELLO A. BABAJI a Abuja
Rundunar sojin Amurka ta tabbatar da mutuwar dukkanin jami’anta guda shida da ke cikin jirgin KC-135 da ya faɗi a yammacin Iraƙi.
A wani saƙo da ta wallafa a shafin X, ta ce har yanzu ana binciken yadda al’amarin ya faru, amma ta tabbatar cewa faɗuwar jirgin bai da alaƙa da harbin abokan gaba ko kuma harbin kuskure daga bangaren sojojin nata, kamar yadda ta shaida a ranar Juma’a.
Rundunar ta ce lamarin ya faru ne “a cikin sararin samaniya da misalin ƙarfe 2 na rana. (Lokacin Gabas) a yammacin Iraki.”
Ta bayyana cewa lamarin ya shafi jiragen sama guda biyu, da suka haɗa da na Sojan Saman Amurka KC-135 wanda ya rasa iko da kuma jirgin F/A-18F na ruwa na Amurka wanda ya sauka lafiya.
A cewar sanarwar, za a bayyana sunayen waɗanda abin ya shafa sa’o’i 24 bayan an sanar da danginsu yadda ya kamata.
