Wasu abubuwan da ke faruwa a duniyar nan kan kasance masu ban mamaki har su sa mutum ya tsaya yana tambayar kansa yadda aka yi abin ya faru. A wannan makon, wani matashi a Wales ya jawo hankalin jama’a bayan ya hau saman wani asibiti sanye da baƙaƙen kaya masu kama da na Ma’ikan Mutuwa, wato ‘Grim Reaper’, abin da ya firgita wasu daga cikin marasa lafiya da ma’aikatan asibitin.
Amma abin da ya ƙara sanya lamarin zama abin mamaki shi ne yadda matashin ya musanta cewa yana kwaikwayon Mala’ikan Mutuwa, yana cewa a maimakon haka, yana kwaikwayon wani tsuntsu ne.
Lamarin mai ban mamaki ya faru ne a ranar 6 ga Yuni, 2026, a Asibitin Ysbyty Glan Clwyd da ke St Asaph, a yankin Denbighshire na Wales.
Matashin, mai suna Leon Gillespie, ɗan shekara 26 daga Deganwy, ya hau saman ginin asibitin sanye da doguwar riga baƙa mai hula, tare da wani abu mai kama da ƙugiya takobi da ake dangantawa irin ta mala’ikan ɗaukar rai.
Rahotanni sun ce Gillespie ya tsaya a saman ginin yana kallon ma’aikata da baƙi da ke ƙasa, yayin da yake yin wasu sautuka, lamarin da ya jawo hankalin jama’a tare da tayar da hankalin wasu daga cikin mutanen da ke asibitin.
Hukumomin ’Yan Sandan North Wales da Hukumar Kashe Gobara da Ceto ta North Wales sun isa wurin bayan an sanar da su. Rahotanni sun ce motoci huɗu na ’yan sanda da wata motar jami’an kashe gobara sun halarci wurin yayin da ake ƙoƙarin shawo kan lamarin.
Bayan kusan minti 50, jami’an tsaro sun yi nasarar saukar da matashin daga saman ginin, sannan aka kama shi.
Abin da ya ƙara ba wa lamarin mamaki shi ne yadda Gillespie ya musanta cewa kayan da ya saka na kwaikwayon Mala’ikan Mutuwa ne.
A lokacin da ya gurfana a gaban kotu, ya bayyana cewa ba wai yana kwaikwayon wani abin da ke wakiltar mutuwa ba ne, illa dai yana kwaikwayon tsuntsu, musamman hankaka.
Sai dai hotonsa da aka ɗauka a saman asibitin ya nuna shi cikin baƙaƙen kaya masu hula, tare da wani dogon abu mai kama da ƙugiya yana riƙe da shi.
Daga bisani, Gillespie ya gurfana a Kotun Majistare ta Llandudno, inda ya amsa laifin haddasa tashin hankali ko hayaniya ba tare da wani sahihin dalili ba a harabar Hukumar Kiwon Lafiya ta ƙasa ta Birtaniya (NHS).
An kuma umarce shi da biyan wasu kuɗaɗe sakamakon wasu laifukan sata guda biyu da ya amsa, waɗanda suka haɗa da satar abincin kyanwa da kayan kula da ita daga wani shago a Llandudno, da kuma wasu kayayyakin abinci da abin sha daga wani babban shagon sayar da kayayyaki.
Hukumar Kiwon Lafiya ta Betsi Cadwaladr University Health Board, wadda ke kula da asibitin, ta sake jaddada cewa tana da manufar rashin haƙuri ga duk wani nau’in cin zarafi, tashin hankali ko tayar da hankali a harabar asibitocinta.
Lamarin ya zama ɗaya daga cikin abubuwan al’ajabi da suka ɗauki hankalin jama’a, musamman saboda yadda wani mutum ya zaɓi saman asibiti — wurin da ake zuwa neman lafiya da ceton rai — domin yin abin da ya jawo firgici da ɗaukar hankalin marasa lafiya da ma’aikatan lafiya.
